ଦୁଇ ସେବାୟତ ଗୋଷ୍ଠୀ ମୁହାଁମୁହିଁ: ଉପାସରେ ମାଆ ହରଚଣ୍ଡୀ

ସାଲେପୁର(ମନୋଜ ଅଚାର୍ଯ୍ୟ): ସେବାୟତଙ୍କ ମଧ୍ୟରେ ବିବାଦକୁ ନେଇ ଗତ ୪ଦିନ ଧରି ମନ୍ଦିରରେ ପୂଜାପାଠ ବନ୍ଦ ରହିଛି। ଉପବାସରେ ରହିଛନ୍ତି ମାଆ ହରଚଣ୍ଡୀ। ଏଭଳି ଘଟଣା ଘଟିଛି କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକର ପ୍ରସିଦ୍ଧ ଶକ୍ତିପୀଠ ଅଶୁରେଶ୍ୱର ହରଚଣ୍ଡୀ ମନ୍ଦିରରେ।
ଅଭିଯୋଗ ଅନୁସାରେ, ଡଙ୍ଗା ସମସ୍ୟାକୁ ନେଇ ଚଳିତବର୍ଷ ମହାପ୍ରଭୁଙ୍କ ଚାପ ଖେଳ ବନ୍ଦ ହୋଇଯାଇଥିଲା। ତେବେ ଏହାକୁ ବିରୋଧ କରି ସେବାୟତମାନଙ୍କ ଭିତରୁ ଗୋଟିଏ ଗୋଷ୍ଠୀ ମନ୍ଦିରରେ ତାଲା ପକାଇଦେଇଛନ୍ତି। କିଛି ସେବାୟତ ଡଙ୍ଗା ଖରାପ ହେବାରୁ ଚାପଖେଳ ନ ହେବା ସପକ୍ଷରେ ଥିଲେ। ହେଲେ ଅନ୍ୟ ଗୋଷ୍ଠୀର ସେବାୟତମାନେ କାହିଁ ଚାପ ଖେଳ ବନ୍ଦ କରାଗଲା, ଏହାକୁ ବିରୋଧ କରି ମନ୍ଦିରରେ ତାଲା ପକାଇ ଦେଇଥିଲେ।
ଦୁଇ ସେବାୟତ ଗୋଷ୍ଠୀକୁ ବୁଝାସୁଝା କରିବାପାଇଁ ପ୍ରତିଦିନ ସମାଧାନ କମିଟି ବୈଠକ ବସୁଛି। ହେଲେ ଏଥିରେ ସମାଧାନର ବାଟ ବାହିରିପାରୁନି। ଘଟଣାକୁ ଦୃଷ୍ଟିରେ ରଖି ଉକ୍ତ ଅଞ୍ଚଳରେ ୧ ପ୍ଲାଟୁନ୍ ପୁଲିସ ଫୋର୍ସ ମୁତୟନ କରାଯାଇଛି। ପ୍ରତିଦିନ ଶତାଧିକ ଶ୍ରଦ୍ଧାଳୁ ମା’ଙ୍କ ଦର୍ଶନ ନ କରି ଫେରିଯାଉଥିବା ଅଭିଯୋଗ ହୋଇଛି। ସମାଧାନ ପାଇଁ ଚେଷ୍ଟା କରାଯାଉଥିବା ସମାଧାନ କମିଟି ଅଧ୍ୟକ୍ଷ ସୂଚନା ଦେଇଛନ୍ତି।
ସେବାୟତ ଅଭିରାମ ତ୍ରିପାଠୀ କହିଛନ୍ତି,“ ମା’ଙ୍କ ନୀତି ବନ୍ଦ କରିବା ଓ ମନ୍ଦିରରେ ତାଲା ପକାଇବା ଆଦୌ ଠିକ୍‌ ନୁହେଁ। ଯେହେତୁ ପ୍ରଶାସନ କିଛି ବୁଝୁନାହିଁ, ସେଥିପାଇଁ ସେମାନେ ମନ୍ଦିରରେ ତାଲା ପକାଇ ଦେଇଛନ୍ତି।”

from Odisha Reporter http://bit.ly/2WK9IZH