ଏକଜିଟ୍ ପୋଲ ଦେଖାଇ ଅଡୁଆରେ ତିନି ଟିଭି ଚ୍ୟାନେଲ, ଇସି ପଠାଇଲା ନୋଟିସ

ନୂଆଦିଲ୍ଲୀ: ନିର୍ବାଚନ ଶେଷ ନହେଉଣୁ ତିନୋଟି ଘରୋଇ ଟିଭି ଚ୍ୟାନେଲ ନିର୍ବାଚନ ଫଳାଫଳର ପୂର୍ବାନୁମାନ କରିଥିଲେ। ଏହାକୁ ନେଇ ନିର୍ବାଚନ କମିଶନ ଗତକାଲି ସଂପୃକ୍ତି ତିନି ଗଣମାଧ୍ୟମ ଚ୍ୟାନେଲକୁ ନୋଟିସ ପଠାଇଛନ୍ତି।

ଦେଶରେ ଆଚରଣବିଧି ଲାଗୁ ହୋଇଥିବା ବେଳେ କେଉଁ ପରିସ୍ଥିତିରେ ଏକଜିଟ୍ ପୋଲ ପ୍ରକାଶ କରିଛନ୍ତି ସେ ନେଇ ଟିଭି ଚ୍ୟାନେଲ ମାନଙ୍କୁ ଜବାବ ମାଗିଛନ୍ତି ନିର୍ବାଚନ କମିଶନ। ଏଥିସହ କାହିଁକି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବନି ସେ ନେଇ ମଧ୍ୟ ଜବାବ ମାଗିଛନ୍ତି। ତିନି ଟିଭି ଚ୍ୟାନେଲ ଏପରି କରିବା ଜନପ୍ରତିନିଧି ଆକ୍ଟ ୧୨୬(ଏ)କୁ ଉଲ୍ଲଂଘନ କରୁଥିବା ଇସି ଦର୍ଶାଇଛନ୍ତି। ତେବେ କେଉଁ ତିନି ଟିଭି ଚ୍ୟାନେଲ ଏକଜିଟ୍ ପୋଲ ପ୍ରକାଶ କରିଛନ୍ତି ସେ ନେଇ ସଠିକ୍ ତଥ୍ୟ ଆମ ପାଖରେ ହସ୍ତଗତ ହୋଇ ନାହିଁ।

ଟିଭି ଚ୍ୟାନେଲ ସହିତ ସୋଶାଲ ମିଡିଆ କମ୍ପାନୀ ଟ୍ୱିଟର କତ୍ତୃପକ୍ଷଙ୍କୁ ନିର୍ବାଚନ କମିଶନ ଏକଜିଟ୍ ପୋଲ ସଂକ୍ରାନ୍ତୀୟ ସମସ୍ତ ଟ୍ୱିଟ୍ ତୁରନ୍ତ ଡିଲିଟ୍ କରିବା ପାଇଁ ନିର୍ଦ୍ଦେଶ ଦେଇଛନ୍ତି।

ମେ ୧୯ରେ ଚଳିତ ସାଧାରଣ ନିର୍ବାଚନର ଅନ୍ତିମ ପର୍ଯ୍ୟାୟ ନିର୍ବାଚନ ରହିଛି। ସଂଧ୍ୟା ୬ଟାରେ ଭୋଟିଂ ଶେଷ ହେବା ପରେ ଟିଭି ଚ୍ୟାନେଲ ମାନେ ଏକଜିଟ୍ ପୋଲ ରେଜଲ୍ଟ ପ୍ରକାଶ କରିପାରିବେ ବୋଲି ନିୟମ ରହିଛି।

from Odisha Reporter http://bit.ly/2Hsu7Ms