ଜୀବନ ଥିବା ବେଳେ କେହି ଶୁଣିଲେନି, ମଲା ପରେ ଦେଉଛନ୍ତି ସହାୟତା

ଖୋର୍ଦ୍ଧା (ଓଡ଼ିଶା ରିପୋର୍ଟର): ମୃତ୍ୟୁ ପୂର୍ବରୁ ଯେଉଁ ସହାୟତା ପାଇଁ ଦୌଡି ଦୌଡ଼ି ଜୋତା ଘୋରି ଯାଇଥିବା ଏବେ ମିଳୁଛି ତାହା। ଏ ହେଉଛି ରାଜଧାନୀ ଭୁବନେଶ୍ୱରଠାରୁ ଅଳ୍ପ ଦୂର ଖୋର୍ଦ୍ଧା ଜିଲ୍ଲା ନିରାକାରପୁରର ମୃତ ଚାଷୀ ଲକ୍ଷ୍ମୀଧର ବେହେରାଙ୍କ କଥା। ଆଜି ବିଡିଓ ମୃତ ଲକ୍ଷ୍ମୀଧରଙ୍କ ଘରକୁ ଯାଇ ତାଙ୍କ ପତ୍ନୀଙ୍କୁ ୧ ଲକ୍ଷ ୨୦ ହଜାର ଟଙ୍କାର ବିଜୁ ପକ୍କା ଘର(ତିତିଲି) କାର୍ଯ୍ୟାଦେଶ ଦେଇଛନ୍ତି। ପକ୍କା ଘର ଖଣ୍ଡେ ପାଇଁ ଲାଞ୍ଚ ଦେଇ ନପାରିବାରୁ ଲକ୍ଷ୍ମୀଧର ଆତ୍ମହତ୍ୟାର ପଥ ବାଛି ନେଇଥିଲେ। ତେବେ ମୃତ୍ୟୁ ପୂର୍ବରୁ ସେ ସରକାରୀ ବ୍ୟବସ୍ଥା ଓ ରାଜ୍ୟରେ ଚାଲିଥିବା ପିସି କାରବାର ଗୁମର ଏକ ଭିଡିଓରେ କହି ଯାଇଥିଲେ।

ଲକ୍ଷ୍ମୀଧରଙ୍କ ଆତ୍ମହତ୍ୟା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟିମ୍‌ଓ୍ୱାର୍କ, ଟ୍ରାନ୍ସପାରେନ୍ସି ଓ ଟେକ୍ନୋଲୋଜି(ଥ୍ରୀ ଟି) କେତେଦୂର କାର୍ଯ୍ୟକାରୀ ହେଉଛି ତାହାକୁ ପଦାରେ ପକାଇ ଦେଇଛି। ଲକ୍ଷ୍ମୀଧରଙ୍କ ପରି ଜଣେ ଗରିବ ଚାଷୀ ନ୍ୟାୟ ପାଇଁ ବିଡିଓଙ୍କଠାରୁ ଆରମ୍ଭ କରି ସରପଞ୍ଚଙ୍କ ପର୍ଯ୍ୟନ୍ତ ଗୁହାରି କରି ନିରାଶ ହୋଇଥିଲେ। ତାଙ୍କ ନେହୁରା କେହି ନ ଶୁଣିବାରୁ ସେ ଆତ୍ମହତ୍ୟାର ରାସ୍ତା ବାଛି ନେଇଥିଲେ। ମୃତ୍ୟୁ ପୂର୍ବରୁ ରାଜ୍ୟ ସରକାର ଓ ମୁଖ୍ୟମନ୍ତ୍ରୀଙ୍କୁ ଏକ ଭିଡିଓ ଜରିଆରେ ଦେଇ ଯାଇଥିଲେ ଜୀବନର ଶେଷ ବାର୍ତ୍ତା।

from Odisha Reporter http://bit.ly/2DjuKHi