ସୁଆଦିଆ ନୁହେଁ ଇଜିପ୍ଟ ପିଆଜ, ଅଧାରେ ବି ନେଉ ନାହାନ୍ତି ଲୋକ

ଭୁବନେଶ୍ୱର(ଓଡ଼ିଶା ରିପୋର୍ଟର): ଦେଶୀ ପିଆଜ ପରି ସୁଆଦିଆ ନୁହେଁ ଇଜିପ୍ଟରୁ ଆସିଥିବା ପିଆଜ। ତେଣୁ ୨ ମାସ ହେବ ବିକ୍ରି ହୋଇ ନ ପାରି ପଡ଼ି ରହିଛି। ଏହା କ୍ରମଶଃ ପଚିବାକୁ ବସିଥିବା ବେଳେ ଅଧା ଦାମ୍‌ରେ ଦେଲେ ବି ନେଉ ନାହାନ୍ତି ଲୋକେ । ଯାହାକି ଏବେ ସରକାରଙ୍କ ମୁଣ୍ଡ ବିନ୍ଧାର କାରଣ ପାଲଟିଛି।

୨ ମାସ ମଧ୍ୟରେ ମାତ୍ର ୨ ହଜାର ଟନ୍ ପିଆଜ ବିକ୍ରି ହୋଇପାରିଛି । ଆହୁରି ୩୪ ହଜାର ଟନ୍ ଇଜିପ୍ଟ ପିଆଜ ବିକ୍ରି ନ ହୋଇ ପଡ଼ି ରହିଛି। ଏହି ପିଆଜ ବଡ଼ ଓ ସ୍ୱାଦହୀନ ହୋଇଥିବାରୁ କିଣିବାକୁ ଆଗ୍ରହ ପ୍ରକାଶ କରୁ ନାହାନ୍ତି ଗ୍ରାହକ।

ଗତ ନଭେମ୍ବର ଓ ଡିସେମ୍ବର ମାସରେ ରାଜ୍ୟରେ ପିଆଜ ସଙ୍କଟ ଦେଖାଦେଇଥିବା ବେଳେ ତୁର୍କୀ ଓ ଇଜିପ୍ଟରୁ ଏହି ପିଆଜ ମଗାଯାଇଥିଲା । କିଲୋ ପ୍ରତି ୫୫ ଟଙ୍କାରେ ଏହାକୁ ବିକ୍ରି କରିବାକୁ ଯୋଜନା କରାଯାଇଥିଲା । ହେଲେ କେହି କିଣୁନଥିବାରୁ ଏବେ ୨୫ ଟଙ୍କାରେ ବିକିବାକୁ ସରକାର ନିଷ୍ପତ୍ତି ନେଇଛନ୍ତି ।

ଅଧା ଦାମରେ ବିକ୍ରି କରାଗଲେ ସରକାର ଅଧାରୁ ଅଧିକ କ୍ଷତି ସହିବେ । କିନ୍ତୁ ଅଧିକ ଦିନ ରଖାଯିବା ଅସମ୍ଭବ ହେଉଥିବାରୁ ସରକାର ଏହାକୁ ତୁରନ୍ତ ବିକ୍ରି କରିବା ଲାଗି ଯୋଜନା କରୁଛନ୍ତି । ତଥାପି ଏହାକୁ କିଣିବାକୁ ଲୋକେ ଆଗ୍ରହ ପ୍ରକାଶ କରୁ ନାହାନ୍ତି।

ଆମ ରାଜ୍ୟରେ ବିକ୍ରି ନ ହେଲେ  ପଡ଼ୋଶୀ ଦେଶ ବାଂଲାଦେଶ, ଶ୍ରୀଲଙ୍କା, ନେପାଳ ଓ ମାଲଦ୍ୱୀପକୁ ପଠାଇବାକୁ ମଧ୍ୟ ଯୋଜନା କରାଯାଉଥିବା ସୂଚନା ମିଳିଛି ।

from Odisha Reporter https://ift.tt/376xtQK