ଚମକିଲେ କୁଲ୍‌ଦୀପ୍ ଓ ରୋହିତ: ଇଂଲଣ୍ଡକୁ ହରାଇଲା ଭାରତ

ଭୁବନେଶ୍ୱର (ଓଡ଼ିଶା ରିପୋର୍ଟର): ଟ୍ୱେଣ୍ଟି-୨୦ ଶୃଙ୍ଖଳାକୁ ୨-୧ରେ ଜିତିଥିବା ଭାରତ ପ୍ରଥମ ଦିନିକିଆରେ ଇଂଲଣ୍ଡକୁ ୮ ୱିକେଟ୍‌ରେ ପରାସ୍ତ କରିଛି। ଏହା ସହିତ ୩ଟି ମ୍ୟାଚ୍ ବିଶିଷ୍ଟ ଏହି ଦିନିକିଆ ଶୃଙ୍ଖଳାରେ ଭାରତ ୧-୦ରେ ଆଗୁଆ ରହିଛି।

ନଟିଂହାମ୍‌ରେ ଗତକାଲି ଖେଳା ଯାଇଥିବା ଏହି ମ୍ୟାଚ୍‌ରେ ଭାରତ ଟସ୍ ଜିତି ଫିଲ୍‌ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରିବାକୁ ଆସିଥିବା ଇଂଲଣ୍ଡ ଦଳ ୪୯.୫ ଓଭରରେ ସମସ୍ତ ୱିକେଟ୍ ହରାଇ ୨୬୮ ରନ୍ କରିଥିଲା। ଦଳ ପକ୍ଷରୁ ଜୋସ୍ ବଟ୍‌ଲର୍ ୫୩ ରନ୍ କରିଥିବା ବେଳେ ବେନ୍ ଷ୍ଟୋକ୍‌ସ ୫୦, ଜାସନ୍ ରୟ ୩୮, ଜନି ବେୟାରାଷ୍ଟୋ ୩୮, ମୋଇନ୍ ଅଲୀ ୨୪ ଓ ଆଦିଲ୍ ରସିଦ୍ ୨୨ ରନ୍ କରିଥିଲେ। ଭାରତ ପକ୍ଷରୁ କୁଲ୍‌ଦୀପ୍‌ ଯାଦବ ସର୍ବାଧିକ ୬ଟି ୱିକେଟ୍ ନେଇଥିଲେ। ସେ ୧୦ ଓଭର ବୋଲିଂ କରି ମାତ୍ର ୨୫ ରନ୍ ଦେଇ ୬ଟି ୱିକେଟ୍ ନେଇଥିଲେ। ଉମେଶ ଯାଦବ ୯.୫ ଓଭରରେ ୭୦ ରନ୍ ଦେଇ ଦୁଇଟି ୱିକେଟ୍ ନେଇଥିବା ବେଳେ ଚହଲ୍ ଗୋଟିଏ ୱିକେଟ୍ ନେଇଥିଲେ।

୨୬୯ ରନ୍‌ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇ ଥିବା ଭାରତୀୟ ଦଳ ମାତ୍ର ୪୦.୧ ଓଭରରେ ଏହାକୁ ହାସଲ କରି ନେଇଥିଲା। ଦଳ ମାତ୍ର ଦୁଇଟି ୱିକେଟ୍ ହରାଇଥିଲା। ଶିଖର ଧାୱନ ୪୦ ରନ୍ କରି ଆଉଟ୍ ହୋଇଥିବା ବେଳେ ଅଧିନାୟକ ବିରାଟ କୋହଲି ୭୫ ରନ୍ କରିଥିଲେ। ବୋଲିଂରେ କୁଲଦୀପ ଯାଦବ ଯାଦୁ ଦେଖାଇବା ପରେ ବ୍ୟାଟିଂରେ କମାଲ କରିଥିଲେ ରୋହିତ ଶର୍ମା। ସେ ଅପରାଜିତ ୧୩୭ ରନ୍ କରିଥିଲେ। ରୋହିତ ୧୧୪ଟି ବଲ୍‌ରୁ ୧୫ଟି ଚୌକା ଓ ୪ଟି ଛକା ମାରିଥିଲେ। ୮୨ଟି ବଲ୍‌ରେ ସେ ଶତକ ପୂରଣ କରିଥିଲେ। ଏହା ପୂର୍ବରୁ ଇଂଲଣ୍ଡ ବିପକ୍ଷ ଶେଷ ଟ୍ୱେଣ୍ଟି-୨୦ରେ ମଧ୍ୟ ସେ ଶତକ ମାରିଥିଲେ। ଲୋକେଶ ରାହୁଲ୍ ୯ ରନ୍ କରି ନଟ୍‌ ଆଉଟ୍ ରହିଥିଲେ।

ଇଂଲଣ୍ଡ ପକ୍ଷରୁ ମୋଇନ୍ ଅଲୀ ଓ ଆଦିଲ୍ ରସିଦ୍ ଗୋଟିଏ ଲେଖାଏ ୱିକେଟ୍ ନେଇଥିଲେ।

ଭାରତ ଓ ଇଂଲଣ୍ଡ ମଧ୍ୟସ୍ଥ ଦ୍ୱିତୀୟ ଦିନିକିଆ ମ୍ୟାଚ୍ ଆସନ୍ତା କାଲି ଲଣ୍ଡନର ଲର୍ଡସ୍ ଗ୍ରାଉଣ୍ଡରେ ଖେଳାଯିବ।

 

from OdishaReporter https://ift.tt/2LdH6SK