ବିଶ୍ୱକପ୍‌ ହକି: ଷ୍ଟାର୍‌ ହୋଟେଲ୍‌ ଅଭାବ ଲଜ୍ଜିତ କରିବନି ତ ?

ଭୁବନେଶ୍ୱର (ଓଡ଼ିଶା ରିପୋର୍ଟର): ଆସନ୍ତା ନଭେମ୍ବର ୨୮ ତାରିଖରୁ ହକି ରଙ୍ଗରେ ରଙ୍ଗେଇ ହୋଇଯିବ ରାଜଧାନୀ ଭୁବନେଶ୍ୱର। କାରଣ ନଭେମ୍ବର ୨୮ରୁ ଡିସେମ୍ବର ୧୬ ତାରିଖ ପର୍ଯ୍ୟନ୍ତ ଭୁବନେଶ୍ୱର ପାଲଟି ଯିବ ବିଶ୍ୱକପ୍‌ ହକି ମଇଦାନ୍‌। ସାରା ବିଶ୍ୱର ନଜର ଏହା ଉପରେ ଥିବାରୁ ରାଜ୍ୟ ସରକାର ଏହାକୁ ସଫଳ କରିବାକୁ ଆଣ୍ଠୁଗଣ୍ଠି ଲଗାଇ ଦେଇଛନ୍ତି। ପ୍ରସ୍ତୁତି ଏକ ପ୍ରକାର ଶେଷ ପର୍ଯ୍ୟାୟରେ ପହଞ୍ଚିଛି। ହେଲେ, ରାଜ୍ୟ ସରକାରଙ୍କୁ ଏବେ ଗୋଟିଏ ଚିନ୍ତା ଘାରିବାରେ ଲାଗିଛି। ସରକାରଙ୍କ ଚିନ୍ତାର କାରଣ ହେଲା ଷ୍ଟାର୍‌ ହୋଟେଲର ଅଭାବ।

ବିଶ୍ୱକପ୍‌ ହକି ସମୟରେ ୧୫ ହଜାରୁ ଅଧିକ ବିଦେଶୀ ପର୍ଯ୍ୟଟକ ରାଜ୍ୟକୁ ଆସିବେ ବୋଲି ଅନୁମାନ କରାଯାଉଛି। ହେଲେ ସେମାନଙ୍କ ରହିବା ପାଇଁ ସମସ୍ୟା ସୃଷ୍ଟି କରିପାରେ ଷ୍ଟାର୍‌ ହୋଟେଲର ଅଭାବ। କାରଣ ବିଦେଶୀ ଦର୍ଶକଙ୍କ ଲାଗି ଯେଉଁ ଷ୍ଟାଣ୍ଡାର୍ଡ ଓ ଯେତେ ସଂଖ୍ୟାକ ହୋଟେଲ୍‌ ଆବଶ୍ୟକ ତାହା ରାଜଧାନୀ ଭୁବନେଶ୍ୱର ସମେତ କଟକ ଓ ପୁରୀକୁ ମିଶାଇଲେ ବି ମିଳିବା କଷ୍ଟ।

ବିଶ୍ୱକପରେ ଅଂଶଗ୍ରହଣ କରୁଥିବା ୧୬ଟି ଦେଶର ଖେଳାଳି, ଟୁର୍ଣ୍ଣାମେଣ୍ଟ ଅଫିସିଆଲ, ହକି ସଂଘର କର୍ମକର୍ତ୍ତା, ଭିଭିଆଇପି, ଟିଭି ବ୍ରଡକାଷ୍ଟର ଓ ଦେଶ ବିଦେଶରୁ ଆସିବାକୁ ଥିବା ଦର୍ଶକଙ୍କ ପାଇଁ ରାଜଧାନୀରେ ପର୍ଯ୍ୟାପ୍ତ ସଂଖ୍ୟକ ଷ୍ଟାର ହୋଟେଲ ନାହିଁ। ଖେଳାଳି ଓ ଅଫିସିଆଲଙ୍କ ଲାଗି ସରକାର ଭୁବନେଶ୍ୱରର ୮ଟି ତାରକା ହୋଟେଲ୍‌ ବୁକ୍ କରିଛନ୍ତି। ତେବେ ବିଦେଶୀ ଦର୍ଶକଙ୍କ ଲାଗି ଆବଶ୍ୟକ ସଂଖ୍ୟାକ ଭଲ ହୋଟେଲ ନଥିବାରୁ ସରକାରଙ୍କ ଚିନ୍ତା ବଢ଼ି ଯାଇଛି।

ସୂଚନାଯୋଗ୍ୟ, ବିଶ୍ୱକପ୍‌ ସମୟରେ ୧୫ ହଜାରରୁ ଅଧିକ ବିଦେଶୀ ଦର୍ଶକ ଆସିବେ ବୋଲି ଅନୁମାନ କରାଯାଉଛି। ଅଧିକ ସଂଖ୍ୟାକ ଦର୍ଶକଙ୍କୁ ଆକର୍ଷିତ କରିବାକୁ ହେଲେ ସେମାନେ ଆବଶ୍ୟକ କରୁଥିବା ହୋଟେଲ୍‌ ବ୍ୟତୀତ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ମଧ୍ୟ କରିବାକୁ ପଡ଼ିବ। ହେଲେ ରାଜଧାନୀ କଥା ତ ଛାଡ଼ନ୍ତୁ ପୁରୀ ଓ କଟକକୁ ମିଶାଇଲେ ମଧ୍ୟ ଆବଶ୍ୟକ ସଂଖ୍ୟକ ଭଲ ହୋଟେଲ ମିଳିବା କଷ୍ଟକର।

ରାଜ୍ୟ କ୍ରୀଡ଼ା ବିଭାଗ ନିଜ ୱେବସାଇଟ୍‌ରେ ଦର୍ଶକଙ୍କ ଲାଗି ପ୍ରାୟ ୩ ଶହ ହୋଟେଲ୍‌ର ତାଲିକା ଦେଇଛି। ହେଲେ ଏହି ହୋଟେଲ୍‌ଗୁଡ଼ିକର ବ୍ୟବସ୍ଥାକୁ ବିଦେଶୀ ଦର୍ଶକ କେତେ ପସନ୍ଦ କରୁଛନ୍ତି ତାହା ଦେଖିବାକୁ ବାକି ରହିଲା।

from Odisha Reporter https://ift.tt/2wpOfZP