ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ହତ୍ୟା ଧମକ

ଭୁବନେଶ୍ୱର(ଓଡ଼ିଶା ରିପୋର୍ଟର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଖକୁ ହତ୍ୟା ଧମକ ଆସିଛି। ଏକ ଚିଠି ମାଧ୍ୟମରେ ନବୀନଙ୍କୁ ହତ୍ୟା କରିବାକୁ ଧମକ ଦିଆଯାଇଛି। ଛତିଶଗଡ଼ ବିଳାସପୁର ଜେଲ୍‌ରେ ଥିବା ଜଣେ କଏଦୀ ଏମିତି ଧମକପୂର୍ଣ୍ଣ ଚିଠି ଦେଇଛନ୍ତି।

ଏବେ ଏହି ଖବର ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଛି। କଏଦୀ ଜଣଙ୍କ ନବୀନଙ୍କଠାରୁ ୫୦ କୋଟି ଟଙ୍କା ଦାବି କରିଛନ୍ତି।

କଏଦୀ ଜଣଙ୍କ ହେଲେ ପୁଷ୍ପେନ୍ଦ୍ର ନାଥ ଚୌହାନ। ତାଙ୍କ ବୟସ ୪୦ବର୍ଷ।

ବିଳାସପୁର ଏସ୍‌ପି ଆରିଖ ଶେଖଙ୍କ କହିବା ଅନୁସାରେ, ପୁଷ୍ପେନ୍ଦ୍ର ଏକାଧିକ ହତ୍ୟାକାଣ୍ଡରେ ଦୋଷୀ ସାବ୍ୟସ୍ତ ହୋଇ ବିଳାସପୁର ଜେଲ୍‌ରେ ସଜା କାଟୁଛନ୍ତି। ତାଙ୍କୁ ପଚରାଉଚରା ପରେ ସେ ଲୋକଙ୍କ ଧ୍ୟାନ ଆକର୍ଷଣ ପାଇଁ ନବୀନଙ୍କୁ ଏମିତି ଧମକପୂର୍ଣ୍ଣ ଚିଠି ଲେଖିଥିବା ସ୍ୱୀକାର କରିଛି।

ଆରିଖ ଆହୁରି କହିଛନ୍ତି,“ପଚରାଉଚରା ବେଳେ ପୁଷ୍ପେନ୍ଦ୍ର ମାନସିକ ବିକାରଗ୍ରସ୍ତ ଥିବା ଜଣାପଡୁଥିଲା। ତଦନ୍ତ ପରେ ଓଡ଼ିଶା ପୁଲିସ୍‌କୁ ରିପୋର୍ଟ ଦିଆଯିବ।”

from Odisha Reporter https://ift.tt/2LTAYys