ପାରାକୁ ବଞ୍ଚାଇବା ପାଇଁ ଅଟକିଲା ଟ୍ରେନ୍‌

ମୁମ୍ୱାଇ: ଗୁଡ଼ିର ସୁତା ଲାଗି ଆଘାତ ପାଇଥିବା ଏକ ପାରାର ଜୀବନ ବଞ୍ଚାଇବା ପାଇଁ ମୁମ୍ବାଇସ୍ଥିତ ପଶ୍ଚିମ ରେଳବାଇ ତା’ର ଟ୍ରେନ୍‌ ସେବାକୁ ୫ ମିନିଟ୍‌ ଯାଏ ଅଟକାଇ ଦେଇଛି। ଏହି ଖବରଟି ସୋଶାଲ୍‌ ମିଡିଆରେ ଭାଇରାଲ୍‌ ହେବା ପରେ ଭାରତୀୟ ରେଳବାଇକୁ ତା’ର କାମ ପାଇଁ ଏବେ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିଛି।

ସୂଚନା ଅନୁସାରେ, ଗତ ବୁଧବାର ଅର୍ଥାତ୍‌ ଜାନୁଆରୀ ୧୬ ତାରିଖରେ ମୁମ୍ୱାଇର ଗୋରେଗାଓଁ ରେଳ ଷ୍ଟେସନ୍‌ରେ ଏକ ଆଘାତପ୍ରାପ୍ତ ପାରାକୁ ଦେଖିବାକୁ ମିଳିଥିଲା। ପାରାଟି ରେଲୱେ ବିଦ୍ୟୁତ୍‌ ତାରରେ ଫସି ରହିଥିବା ଦେଖିବାକୁ ମିଳିଥିଲା।

To save a pigeon hanging from a kite thread on over head equipment at Goregaon railway station, power supply to OHE was stopped for 5 mins & trains stopped for a while to rescue the bird & save its life. #savinglife #WR pic.twitter.com/JMTgnDiOgL

— Western Railway (@WesternRly) January 17, 2019

ଏହା ପରେ କେହି ଜଣେ ଡେପୁଟି ଷ୍ଟେସନ୍‌ ମାଷ୍ଟର୍‌ଙ୍କୁ ଏ ସମ୍ପର୍କରେ ସୂଚନା ଦେଇଥିଲେ। ପାରାଟି ଏକ ଗୁଡ଼ିର ମାଞ୍ଜା ସୂତାରେ ଗୁଡ଼େଇ ହୋଇ ରେଲୱେ ବିଦ୍ୟୁତ ତାରରେ ଝୁଲି ରହିଥିଲା। ଏହା ପରେ ତୁରନ୍ତ ରେଲୱେର ସମସ୍ତ ବିଦ୍ୟୁତ୍‌ ସରବରାହକୁ କିଛି ସମୟ ପାଇଁ ବନ୍ଦ କରାଯାଇଥିଲା ଏବଂ ଟ୍ରେନ୍‌ ଚଳାଚଳକୁ ପ୍ରାୟ ୫ ମିନିଟ୍‌ ଯାଏ ସ୍ଥଗିତ ରଖାଯାଇଥିଲା। ହଠାତ୍‌ ଟ୍ରେନ୍‌ ଅଟକି ରହିବା କାରଣରୁ କିଛି ଯାତ୍ରୀ ମଧ୍ୟ ଭୟଭୀତ ହୋଇ ପଡ଼ିଥିଲେ। ତେବେ ଆହତ ପାରାଟିକୁ ସୁରକ୍ଷିତ ଭାବେ ଉଦ୍ଧାର କରାଯିବା ପରେ ଟ୍ରେନ୍‌ ଚଳାଚଳ ସ୍ୱାଭାବିକ ହୋଇଥିଲା।

ଏ ସମ୍ପର୍କରେ ମୁମ୍ବାଇସ୍ଥିତ ୱେଷ୍ଟର୍ଣ୍ଣ ରେଲୱେର ମୁଖ୍ୟ ପିଆର୍‌ଓ ରବିନ୍ଦର ଭାକଡ କହିଛନ୍ତି ଯେ “ଆଘାତ ପାଇଥିବା ପାରାକୁ ସକାଳ ୧୦ଟା ୨୮ ମିନିଟ୍‌ରେ ଦେଖିବା ପରେ ୧୦ଟା ୩୩ ମିନିଟ୍‌ ପର୍ଯ୍ୟନ୍ତ ରେଲୱେର ସମସ୍ତ ବିଦ୍ୟୁତ୍‌ ସପ୍ଲାଏ ବନ୍ଦ କରାଯାଇଥିଲା ଏବଂ ଫାୟାର୍‌ ବ୍ରିଗେଡ୍‌ ସାହାଯ୍ୟରେ ପାରାଟିକୁ ସୁରକ୍ଷିତ ଭାବରେ ଉଦ୍ଧାର କରାଯାଇଥିଲା।“
ଭାରତୀୟ ରେଲୱେର ଏହି କାର୍ଯ୍ୟକୁ ଦେଶବ୍ୟାପୀ ପ୍ରଶଂସା କରାଯାଇଛି।

from Odisha Reporter http://bit.ly/2HpK7Su