ନବଙ୍କ ପରେ ନବୀନଙ୍କ ମୋହରେ ତାରା ଆଉ ଚନ୍ଦ୍ର !

ଭୁବନେଶ୍ୱର(ଓଡ଼ିଶା ରିପୋର୍ଟର): ଝାରସୁଗୁଡ଼ାର କଂଗ୍ରେସ ବିଧାୟକ ନବ ଦାସଙ୍କ ବିଜେଡି ଓ ନବୀନ ପଟ୍ଟନାୟକ ମୋହକୁ ନେଇ ଗଣମାଧ୍ୟମରେ ଚର୍ଚ୍ଚା ଲାଗି ରହିଥିବାବେଳେ ଶନିବାର ଜୟପୁରର କଂଗ୍ରେସ ବିଧାୟକ ତାରାପ୍ରସାଦ ବାହିନୀପତିଙ୍କୁ ନବୀନ ନିବାସରେ ଦେଖିବାକୁ ମିଳିଛି। ନିର୍ବାଚନୀ ବର୍ଷରେ ବିଜେଡିକୁ ହଟାଇ କ୍ଷମତାକୁ ଫେରିବାକୁ କଂଗ୍ରେସ ସଂଘର୍ଷ କରୁଥିବାବେଳେ ଦଳର ନେତାମାନଙ୍କର ବିଜେଡି ଓ ନବୀନ ମୋହକୁ ନେଇ ଏବେ ଚର୍ଚ୍ଚା।

ସୂଚନା ଅନୁସାରେ,  ଓଡ଼ିଶା ହାଇକୋର୍ଟର ଦୁଇଟି ସ୍ଥାୟୀ ବେଞ୍ଚ ରାଜ୍ୟର ଦକ୍ଷିଣ ଓ ପଶ୍ଚିମ ଭାଗରେ ସ୍ଥାପନ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ସରକାରଙ୍କୁ ଚିଠି ଲେଖିଥିଲେ। ଏହି ସମାନ କଥାକୁ ମୁଖ୍ୟମନ୍ତ୍ରୀ ୨୦୧୩ ସେପ୍ଟେମ୍ବର ଓ ୨୦୧୮ ସେପ୍ଟେମ୍ବର ଏବଂ ଗତ ଦୁଇଦିନ ତଳେ ଲେଖିଥିବା ଚିଠିରେ ମଧ୍ୟ ଦୋହରାଇଥିଲେ। ମୁଖ୍ୟମନ୍ତ୍ରୀଙ୍କ ଏହି ଚିଠିକୁ ପଶ୍ଚିମ ଓଡ଼ିଶା ମିଳିତ କ୍ରିୟାନୁଷ୍ଠାନ କମିଟି ତତ୍କାଳ ଖାରଜ କରିସାରିଥିବାବେଳେ ଦକ୍ଷିଣ ଓଡ଼ିଶାରୁ ଏକ ପ୍ରତିନିଧି ଦଳକୁ ଆଣି ବିଜେଡି ସେଥିରୁ ରାଜନୀତିକ ଫାଇଦା ନେବାକୁ ପ୍ରୟାସ କରିଛି।

ସବୁଠୁ ବଡ଼ କଥା ହେଲା କୋରାପୁଟ ଜିଲ୍ଲା ପର୍ଯ୍ୟବେକ୍ଷକ ପ୍ରଣବ ପ୍ରକାଶ ଦାସ, ରାଜ୍ୟ ଯୋଜନା ବୋର୍ଡ ସଭ୍ୟ ଈଶ୍ୱର ପାଣିଗ୍ରାହୀ, ଓକିଲ ସଂଘ ଦ୍ୱାରା ମନୋନୀତ ୨ଜଣିଆ କମିଟି- ଆଇନଜୀବୀ ଶିଶିର କୁମାର ମିଶ୍ର ଓ ଅନୁପ କୁମାର ପାତ୍ରଙ୍କ ସଂଯୋଜନାରେ ଏହି ସାକ୍ଷାତକାର ଓ ସମ୍ବର୍ଦ୍ଧନା କାର୍ଯ୍ୟକ୍ରମ ହୋଇଛି ବୋଲି ବିଜେଡି ପକ୍ଷରୁ ଜାରି ପ୍ରେସ ରିଲିଜରେ ଉଲ୍ଲେଖ ରହିଛି।

ତେଣୁ ବିଜେଡି ପକ୍ଷରୁ ପ୍ରାୟୋଜିତ କାର୍ଯ୍ୟକ୍ରମରେ ବିଧାୟକ ବାହିନୀପତି ଓ କଂଗ୍ରେସ ବିଧାୟକ ଚନ୍ଦ୍ରଶେଖର ମାଝୀ ସାମିଲ ହେବା ରାଜନୀତିକ ମହଲରେ ଭ୍ରୁକୁଞ୍ଚନ ସୃଷ୍ଟି କରିଛି। କାରଣ କଂଗ୍ରେସ ବିଧାୟକମାନେ ଯଦି ନବୀନଙ୍କ ଗତ ଦୁଇଦିନ ତଳର ଚିଠିକୁ ନେଇ ଏତେ ସନ୍ତୁଷ୍ଟ ଥିଲେ ତା’ହେଲେ ୨୦୧୮ ସେପ୍ଟେମ୍ବର ୫ରେ ମୁଖ୍ୟମନ୍ତ୍ରୀ ଚିଠି ଲେଖିଲା ପରେ କାହିଁକି ସମ୍ବର୍ଦ୍ଧନା ଦେବାକୁ ନବୀନ ନିବାସ ଯାଇନଥିଲେ।

ସୂଚନା ଅନୁସାରେ କଂଗ୍ରେସ ଏବେ ଜିଲ୍ଲା ରାଜନୀତିରେ ଶ୍ରୀ ବାହିନୀପତି ଓ ଶ୍ରୀ ମାଝୀଙ୍କ ଗୁରୁତ୍ୱକୁ ଅଣଦେଖା କରି ପ୍ରଦୀପ ମାଝୀଙ୍କୁ ପ୍ରାଥମିକତା ଦେଉଥିବାରୁ ନିଜ ଦଳ ଉପରେ ଚାପ ସୃଷ୍ଟି କରିବା ପାଇଁ ତାରା ଏଭଳି ରଣନୀତି ଆପଣାଇଛନ୍ତି ବୋଲି ଚର୍ଚ୍ଚା ହେଉଛି।

from Odisha Reporter http://bit.ly/2TOuSnA