ପ୍ରଧାନମନ୍ତ୍ରୀ ଚୁପ୍ କାହିଁକି: ରାହୁଲ

ନୂଆଦିଲ୍ଲୀ: ଲଦାଖର ଗଲୱାନ ଉପତ୍ୟକାରେ ଲାଇନ୍ ଅଫ୍ ଆକ୍‌ଚୁଆଲ କଣ୍ଟ୍ରୋଲ ଠାରେ ଚୀନ ସେନାର ଆକ୍ରମଣରେ ୨୦ ଭାରତୀୟ ଯବାନ ସହିଦ ହେବା ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିଛନ୍ତି ରାହୁଲ ଗାନ୍ଧୀ। ସେ ଟ୍ୱିଟ୍ କରି କହିଛନ୍ତି- ପ୍ରଧାନମନ୍ତ୍ରୀ କାହିଁକି ଚୁପ୍ ଅଛନ୍ତି? କାହିଁକି ସେ ଲୁଚିଛନ୍ତି? ବହୁତ ହୋଇଗଲା। କ’ଣ ଘଟିଛି, ଆମେ ଜାଣିବାକୁ ଚାହୁଁଛୁ।

ସେ ଆହୁରି ଲେଖିଛନ୍ତି- ଆମ ଯବାନମାନଙ୍କୁ ହତ୍ୟା କରିବାକୁ କେମିତି ସାହାସ କଲା ଚୀନ? ସେମାନେ ଆମ ଜାଗା ନେବାକୁ କେମିତି ସାହାସ କଲେ?

Why is the PM silent?
Why is he hiding?

Enough is enough. We need to know what has happened.

How dare China kill our soldiers?
How dare they take our land?

— Rahul Gandhi (@RahulGandhi) June 17, 2020

ସୂଚନାଯୋଗ୍ୟ, ୧୫-୧୬ ତାରିଖ ରାତିରେ ଚୀନ୍ ଓ ଭାରତୀୟ ସେନା ମଧ୍ୟରେ ସେଠାରେ ରକ୍ତାକ୍ତ ସଂଘର୍ଷ ହୋଇଥିଲା। ଜୁନ୍ ୧୬ ତାରିଖରେ ଉଭୟ ଭାରତ ଓ ଚୀନ ସେନାର ବରିଷ୍ଠ ଅଧିକାରୀଙ୍କ ବୈଠକ ପୂର୍ବରୁ ସୀମାରେ ଚୀନ୍ ତା’ର ଯବାନଙ୍କ ସଂଖ୍ୟା କମାଇବା ସହିତ ଗଲୱାନ ଉପତ୍ୟକାରେ ନିଜ ଅଞ୍ଚଳକୁ ଫେରିଯିବ ବୋଲି ନିଷ୍ପତ୍ତି ହୋଇଥିଲା। କିନ୍ତୁ ଏହା ସତ୍ତ୍ୱେ ଚୀନ୍ ସେନା ସ୍ଥିତାବସ୍ଥାରେ କୌଣସି ପରିବର୍ତ୍ତନ ଦେଖାଯାଇ ନଥିଲା। ସେଥିପାଇଁ ‘୧୬ ବିହାର ରେଜିମେଣ୍ଟ’ର କର୍ଣ୍ଣାଲ୍ ସନ୍ତୋଷ ବାବୁଙ୍କ ନେତୃତ୍ୱରେ ଭାରତୀୟ ସେନାର ଏକ ଛୋଟ ଦଳ ଚୀନ ସେନା ସହିତ ଆଲୋଚନା କରିବାକୁ ଯାଇଥିଲା। ତେବେ ଆଲୋଚନା ବେଳେ ଉତ୍‌କ୍ଷିପ୍ତ ହୋଇ ଚୀନ ଯବାନମାନେ ହଠାତ୍ ସେମାନଙ୍କ ଉପରେ ଆକ୍ରମଣ କରି ଦେଇଥିଲେ। ଲୁହା ରଡ୍ ଓ ପଥରରେ ସେମାନେ ଆକ୍ରମଣ କରିଥିଲେ। ସେତେବେଳେ ଭାରତୀୟ ଯବାନଙ୍କ ତୁଳନାରେ ଚୀନର ୩ ଗୁଣା ଅଧିକ ଯବାନ ଥିଲେ। ଅବଶ୍ୟ ମାରପିଟ ଆରମ୍ଭ ହେବାର କିଛି ସମୟ ଭିତରେ ଭାରତୀୟ ଯବାନଙ୍କ ଆଉ ଏକ ଦଳ ସେଠାରେ ପହଞ୍ଚି ଯାଇଥିଲା। ପ୍ରାୟ ୩ ଘଣ୍ଟା ଧରି ଉଭୟ ପକ୍ଷ ଯବାନଙ୍କ ମଧ୍ୟରେ ସେଠାରେ ସଂଘର୍ଷ ହୋଇଥିଲା। ଏହି ସଂଘର୍ଷରେ କର୍ଣ୍ଣେଲ ସନ୍ତୋଷ ବାବୁ ଏବଂ ଆଉ ୨ ଯବାନଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଆଉ ୧୭ ଯବାନ ଆହତ ହୋଇଥିଲେ ଓ କମ୍ ତାପାମାତ୍ରା ଯୋଗୁ ପରବର୍ତ୍ତୀ ସମୟରେ ସେମାନଙ୍କର ବି ମୃତ୍ୟୁ ଘଟିଥିଲା। ସେହିପରି ନ୍ୟୁଜ୍ ଏଜେନ୍ସୀ ଏଏନ୍‌ଆଇ ଦେଇଥିବା ତଥ୍ୟ ଅନୁଯାୟୀ ଚୀନ୍‌ର ୪୩ ଜଣ ଯବାନ ମୃତାହତ ହୋଇଛନ୍ତି। ଅବଶ୍ୟ ଚୀନ ଏକଥାକୁ ସ୍ୱୀକାର କରୁନାହିଁ।

from Odisha Reporter https://ift.tt/3fru0Qk