ସ୍କୁଟର ଚାଳକଙ୍କ ଉପରେ ପଡ଼ିଲା ୧୮,୫୦୦ ଟଙ୍କା ଫାଇନ୍‌

ରାୟଗଡ଼ା (ଓଡ଼ିଶା ରିପୋର୍ଟର): ରାୟଗଡ଼ାରେ ଜଣେ ସ୍କୁଟର ଚାଳକଙ୍କ ଠାରୁ ଆଦାୟ ହୋଇଛି ୧୮ ହଜାର ୫ଶହ ଟଙ୍କାର ଜୋରିମାନା। ବୈଧ ଲାଇସେନ୍ସ ନଥିବା, ଟ୍ରାଫିକ ଆଇନ ଉଲ୍ଲଂଘନ କରିବା, ହେଲମେଟ ନପିନ୍ଧିବା ଏବଂ ରେଡ୍‌ଲାଇଟ ସିଗ୍‌ନାଲ୍‌ ଅତିକ୍ରମ କରିବା ଆଦି ଅନେକ କାରଣ ଦର୍ଶାଇ ପରିବହନ ବିଭାଗ ପକ୍ଷରୁ ତାଙ୍କ ଠାରୁ ଏହି ଜୋରିମାନା ଆଦାୟ କରାଯାଇଛି।

ଗତକାଲି ସନ୍ଧ୍ୟାରେ ପରିବହନ ବିଭାଗ ଓ ପୁଲିସ ପକ୍ଷରୁ ରାୟଗଡ଼ା ସହରର ଡିଆଇବି ଛକ ନିକଟରେ ଗାଡ଼ି ଯାଞ୍ଚ ଚାଲିଥିଲା। ଏହି ସମୟରେ ସଂପୃକ୍ତ ସ୍କୁଟର ଚାଳକ ଅଟକି ନଥିଲେ। ସେ ଦ୍ରୁତ ଗତିରେ ଖସି ପଳାଇବାକୁ ପ୍ରୟାସ କରିଥିଲେ। ଉପସ୍ଥିତ ପୁଲିସ୍ କର୍ମଚାରୀମାନେ ତାଙ୍କୁ ପିଛା କରିଥିଲେ ଓ ଧରିଥିଲେ।

ତା’ପରେ ତାଙ୍କୁ ଯାଞ୍ଚ କରାଯାଇଥିଲା। ତାଙ୍କ ପାଖରେ ଡ୍ରାଇଭିଂ ଲାଇସେନ୍ସ ନଥିଲା। ସେ ହେଲମେଟ୍ ପିନ୍ଧି ନଥିଲେ। ଗାଡ଼ିର ଇନ୍ସ୍ୟୁରାନ୍ସ କାଗଜପତ୍ର ନଥିଲା। ଏସବୁ ଦେଖିବା ପରେ ପରିବହନ ବିଭାଗ ଅଧିକାରୀମାନେ ତାଙ୍କ ଉପରେ ୧୮ ହଜାର ୫ ଶହ ଟଙ୍କାର ଫାଇନ୍ କରିଥିଲେ।

The post ସ୍କୁଟର ଚାଳକଙ୍କ ଉପରେ ପଡ଼ିଲା ୧୮,୫୦୦ ଟଙ୍କା ଫାଇନ୍‌ appeared first on Odisha Reporter.

from Odisha Reporter https://ift.tt/2QszJ1j