ଅମିତାଭଙ୍କ ଅଙ୍ଗରକ୍ଷୀ ଥିବା ପୁଲିସ୍ କନଷ୍ଟେବଲଙ୍କ ବାର୍ଷିକ ଆୟ ଦେଢ଼ କୋଟି, ତଦନ୍ତ ନିର୍ଦ୍ଦେଶ

ମୁମ୍ବାଇ: ବଲିଉଡ୍ ଷ୍ଟାର ଅମିତାଭ ବଚ୍ଚନଙ୍କ ଅଙ୍ଗରକ୍ଷୀ ଭାବେ ନିଯୁକ୍ତ ହୋଇଥିବା ମୁମ୍ବାଇ ପୁଲିସର ଜଣେ କନଷ୍ଟେବଲଙ୍କ ବାର୍ଷିକ ଆୟ ଦେଢ଼ କୋଟି ବୋଲି ଜଣାପଡ଼ିବା ପରେ ତାଙ୍କୁ ବଦଳି କରି ଦିଆଯାଇଛି। ଏହା ସହିତ ଏହି ଘଟଣାର ବିଭାଗୀୟ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି।

ଏହି କନଷ୍ଟେବଲଙ୍କ ନାଁ ଜିତେନ୍ଦ୍ର ଶିନ୍ଦେ। ସେ ଅନେକ ବର୍ଷ ହେଲା ଅମିତାଭଙ୍କ ଅଙ୍ଗରକ୍ଷୀ ଭାବେ କାର୍ଯ୍ୟ କରି ଆସୁଥିଲେ। ତେବେ ନିକଟରେ ଜଣାପଡ଼ିଲା ଯେ ତାଙ୍କର ବାର୍ଷିକ ଆୟ ଦେଢ଼ କୋଟି ଟଙ୍କା। ତାଙ୍କୁ ଅମିତାଭ ବଚ୍ଚନ ଟଙ୍କା ଦେଉଥିଲେ ନା ସେ ଆଉ କାହାଠାରୁ ଟଙ୍କା ଆଣୁ ଥିଲେ, ମୁମ୍ବାଇ ପୁଲିସ୍ ଏବେ ସେ ନେଇ ତଦନ୍ତ କରୁଛି।

ଶିନ୍ଦେ ମୁମ୍ବାଇ ପୁଲିସ୍ ଅଧିକାରୀମାନଙ୍କୁ କହିଛନ୍ତି ଯେ ତାଙ୍କ ପତ୍ନୀ ଏକ ସିକ୍ୟୁରିଟି ଏଜେନ୍ସୀ ଚଲାନ୍ତି। ଏହି ଏଜେନ୍ସୀ ଅନେକ ସେଲେବ୍ରିଟି ଓ ଜଣାଶୁଣା ଲୋକଙ୍କୁ ସୁରକ୍ଷା ଯୋଗାଇଥାଏ। ସେହିପରି ଅମିତାଭ ବଚ୍ଚନ ତାଙ୍କୁ ଦେଢ଼ କୋଟି ଟଙ୍କା ଦିଅନ୍ତି ନାହିଁ ବୋଲି ସେ ପୁଲିସକୁ କହିଛନ୍ତି।

ମୁମ୍ବାଇ ପୁଲିସ୍ ପକ୍ଷରୁ କୁହାଯାଇଛି ଯେ ଜଣେ ପୁଲିସ୍ କର୍ମଚାରୀ ଗୋଟିଏ ସ୍ଥାନରେ ୫ ବର୍ଷରୁ ଅଧିକ ସମୟ ଧରି ନିଯୁକ୍ତ ହୋଇପାରିବେ ନାହିଁ। ଜିତେନ୍ଦ୍ର ଶିନ୍ଦେ ୨୦୧୫ ମସିହାରୁ ଅମିତାଭ ବଚ୍ଚନଙ୍କ ଅଙ୍ଗରକ୍ଷୀ ଭାବେ କାର୍ଯ୍ୟ କରିଆସୁଥିଲେ।

ଅମିତାଭ ବଚ୍ଚନଙ୍କୁ ଏକ୍ସ ବର୍ଗର ସୁରକ୍ଷା ଯୋଗାଇ ଦିଆଯାଇଛି। ସଦାବେଳେ ଦୁଇ ଜଣ କନଷ୍ଟେବଲ ତାଙ୍କ ସହିତ ରହନ୍ତି। ଅଙ୍ଗରକ୍ଷୀଙ୍କ ମଧ୍ୟରୁ ଶିନ୍ଦେ ଅମିତାଭ ବଚ୍ଚନଙ୍କର ସବୁଠୁ ପ୍ରିୟ ଥିଲେ। ଅମିତାଭଙ୍କ ସହିତ ତାଙ୍କୁ ସବୁ ଜାଗାରେ ଦେଖିବାକୁ ମିଳୁଥିଲା। ତେବେ ଏବେ ତାଙ୍କୁ ଦକ୍ଷିଣ ମୁମ୍ବାଇର ଏକ ପୁଲିସ୍ ଥାନାକୁ ବଦଳି କରି ଦିଆଯାଇଛି।

The post ଅମିତାଭଙ୍କ ଅଙ୍ଗରକ୍ଷୀ ଥିବା ପୁଲିସ୍ କନଷ୍ଟେବଲଙ୍କ ବାର୍ଷିକ ଆୟ ଦେଢ଼ କୋଟି, ତଦନ୍ତ ନିର୍ଦ୍ଦେଶ appeared first on Odisha Reporter.

from Odisha Reporter https://ift.tt/3zo7DpA