ପ୍ରଶାନ୍ତ କିଶୋରଙ୍କୁ ନେଇ ଶେଷ ନିଷ୍ପତ୍ତି ନେବେ ସୋନିଆ

ନୂଆଦିଲ୍ଲୀ: ନିର୍ବାଚନ ଷ୍ଟ୍ରାଟେଜିଷ୍ଟ ପ୍ରଶାନ୍ତ କିଶୋର। ସେ କଂଗ୍ରେସରେ ଏଣ୍ଟ୍ରି କରିବେ ନା ନାହିଁ। ସେ ନେଇ ନିଷ୍ପତ୍ତି ନେବେ କଂଗ୍ରେସରେ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧି। ସେ ଯାହା କହିବେ ତାହା ହିଁ ହେବ ଶେଷ ନିଷ୍ପତ୍ତି।

ଏହି ପ୍ରସଙ୍ଗକୁ ନେଇ ସୋନିଆ ଗାନ୍ଧି ଅନେକ ବରିଷ୍ଠ ନେତାଙ୍କ ସହ ଆଲୋଚନା କରିଛନ୍ତି। ସୁତ୍ର ଅନୁସାରେ, କିଛି ବରିଷ୍ଠ ନେତା କଂଗ୍ରେସରେ ପ୍ରଶାନ୍ତ କିଶୋରଙ୍କୁ ସାମିଲ କରାଇବା ନେଇ ଆପତ୍ତି ଉଠାଇଥିବା ବେଳେ ଆଉ କିଛି ସମର୍ଥନ କରିଛନ୍ତି। କାରଣ ପ୍ରଶାନ୍ତ କିଶୋର କଂଗ୍ରେସକୁ ଆସିଲେ ଦଳର ଲାଭ ହେବ। କଂଗ୍ରେସର ସ୍ଥିତି ମଜଭୁତ ହେବ ବୋଲି ସେମାନେ ଚିନ୍ତା କରୁଛନ୍ତି। କିନ୍ତୁ ଏସବୁ ଭିତରେ ସୋନିଆ ଗାନ୍ଧି ହିଁ ଶେଷ ନିଷ୍ପତ୍ତି ନେବେ ବୋଲି ଜଣାପଡିଛି।

କିଶୋର ନିକଟରେ ତୃଣମୂଳ କଂଗ୍ରେସ ସହ କାମ କରିଛନ୍ତି ଏବଂ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ​​ଦଳର ବିଜୟ ପାଇଁ ତାଙ୍କୁ ଶ୍ରେୟ ଦିଆଯାଉଛି।  କିଶୋର ନିର୍ବାଚନ ସମ୍ବନ୍ଧୀୟ ପ୍ରସଙ୍ଗରେ ସମ୍ପୂର୍ଣ୍ଣ ଭୂମିକା ଏବଂ ନିଷ୍ପତ୍ତି ଅଧିକାର ଚାହୁଁଛନ୍ତି, ତେଣୁ ଦଳର ନେତାମାନେ ପ୍ରାର୍ଥୀ ଚୟନରେ ଜଣେ ବ୍ୟକ୍ତିଙ୍କୁ ପୂର୍ଣ୍ଣ ସ୍ୱାଧୀନତା ଦେବାକୁ ବିରୋଧ କରୁଛନ୍ତି।

ଦୁଇଟି ନିର୍ବାଚନରେ ​​ପରାଜୟ ପରେ କଂଗ୍ରେସ ଏବେ ଜଣେ ନିର୍ବାଚନୀ ପରାମର୍ଶଦାତାଙ୍କୁ ଖୋଜୁଛି। ବରିଷ୍ଠ ନେତା ଅହମ୍ମଦ ପଟେଲଙ୍କ ଦେହାନ୍ତ ପରେ କଂଗ୍ରେସ ରଣନୀତିଜ୍ଞଙ୍କୁ ହରାଇଛି।

ମିଳିଥିବା ସୂଚନା ମୁତାବକ, ଏହାରି ଭିତରେ ପ୍ରଶାନ୍ତ କିଶୋର ଅନେକ ଥର କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଭେଟି ସାରିଲେଣି। ଏହି ଦେଖାସାକ୍ଷାତରେ ଉଭୟ ଆସନ୍ତା ବର୍ଷ ହେବାକୁ ଥିବା ଉତ୍ତର ପ୍ରଦେଶ ସମେତ ଅନ୍ୟ କେତେକ ରାଜ୍ୟର ବିଧାନସଭା ନିର୍ବାଚନ ପୂର୍ବରୁ ଦଳର ପୁନରୁଦ୍ଧାର ଉପରେ ଚର୍ଚ୍ଚା କରିଛନ୍ତି।

ଏହି ଆଲୋଚନା ପରେ ରାହୁଲ ଗାନ୍ଧି ଅନୌପଚାରିକ ରୂପେ କଂଗ୍ରେସ ନେତାଙ୍କ ସହ ଆଲୋଚନା କରିଛନ୍ତି ଏବଂ କିଶୋରଙ୍କ ଦଳରେ ପ୍ରବେଶ ନେଇ ସେମାନଙ୍କର ମତାମତ ଲୋଡ଼ିଛନ୍ତି। ସେପଟେ କିଶୋର ମହାସଚିବ ପ୍ରିୟଙ୍କା ଗାନ୍ଧି ଏବଂ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ମଧ୍ୟ ଭେଟିଛନ୍ତି। ସେ କଂଗ୍ରେସ ନେତୃତ୍ୱକୁ ନେଇ ତାଙ୍କୁ ଏକ ପ୍ରସ୍ତାବ ଦେଇଛନ୍ତି।

ସୂଚନା ମୁତାବକ, ଖୁବଶୀଘ୍ର ପ୍ରଶାନ୍ତ କିଶୋର କଂଗ୍ରେସରେ ମିଶିବା ନେଇ ସମ୍ଭାବନା ରହିଛି। ତାଙ୍କୁ ନିର୍ବାଚନୀ ରଣନୀତି ପ୍ରଭାରୀ ମହାସଚିବ ରୂପେ ନିଯୁକ୍ତି କରାଯାଇପାରେ। କିନ୍ତୁ ଦଳର ବରିଷ୍ଠ ନେତାଙ୍କ କହିବା ଅନୁସାରେ ନିର୍ବାଚନୀ ଦାୟିତ୍ୱ ଜଣେ ବ୍ୟକ୍ତିଙ୍କୁ ଦେବା ଠିକ୍‌ ନୁହେଁ। କିଶୋରଙ୍କ ଉପରେ ପୂରା ବିଶ୍ୱାସ କରାଯାଇପାରିବ ନାହିଁ।

କଂଗ୍ରେସ ଆସନ୍ତା ବର୍ଷ ଉତ୍ତର ପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଏବଂ କିଛି ପୂର୍ବୋତ୍ତର ରାଜ୍ୟରେ ହେବାକୁ ଥିବା ନିର୍ବାଚନ ପାଇଁ ପ୍ରସ୍ତୁତି ଚଳାଇଛି।

The post ପ୍ରଶାନ୍ତ କିଶୋରଙ୍କୁ ନେଇ ଶେଷ ନିଷ୍ପତ୍ତି ନେବେ ସୋନିଆ appeared first on Odisha Reporter.

from Odisha Reporter https://ift.tt/3mRpUIp