ଭାରତ ସହ ବିବାଦ ଭିତରେ ନୂଆ ‘ଲ୍ୟାଣ୍ଡ ବର୍ଡର ଲ’ ଆଣିଲା ଚୀନ୍‌

ନୂଆଦିଲ୍ଲୀ: ଭାରତ ସହ ସୀମା ବିବାଦ ଭିତରେ ଚୀନ୍‌ର ନୂଆ ଚାଲ୍‌। ନୂଆ ଆଇନ୍‌ ପାରିତ କଲା ଡ୍ରାଗନ। ଦେଶର ସାର୍ବଭୌମତା ଓ ଆଞ୍ଚଳିକ ଅଖଣ୍ଡତା ‘ପବିତ୍ର ଏବଂ ଅଦୃଶ୍ୟ’ ଦର୍ଶାଇ ସୀମାବର୍ତ୍ତୀ ଚୀନ୍‌ ସଂସଦରେ ସ୍ଥଳ ଅଞ୍ଚଳର ସୁରକ୍ଷା ସମ୍ବନ୍ଧୀୟ ନୂଆ ଆଇନ୍‌ ଆପଣାଇଛି। ପାରିତ କରିଛି ନୂଆ ‘ଭୂମି ସୀମା ଆଇନ୍‌ ତଥା ଲ୍ୟାଣ୍ଡ ବର୍ଡର ଲ’। ଏହାର ପ୍ରଭାବ ଭାରତ ସହ ବେଜିଂର ସୀମା ବିବାଦ ଉପରେ ପଡିପାରେ।

ନ୍ୟୁଜ୍ ଏଜେନ୍ସି ଶିନ୍‌ହୁଆର ରିପୋର୍ଟ ମୁତାବକ, ନ୍ୟାସନାଲ ପିପୁଲ୍ସ କଂଗ୍ରେସ (ଏନପିସି) ର ସ୍ଥାୟୀ କମିଟି ସଦସ୍ୟମାନେ ଶନିବାର ସଂସଦର ସମାପନ ବୈଠକରେ ଏହି ଆଇନକୁ ଅନୁମୋଦନ କରିଛନ୍ତି। ଏହି ନିୟମ ଆସନ୍ତା ବର୍ଷ ଜାନୁଆରୀ ୧ ରୁ ଲାଗୁ ହେବ। ଆଇନ ଅନୁଯାୟୀ, ପିପୁଲ୍ସ ରିପବ୍ଲିକ୍ ଅଫ୍ ଚାଇନାର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତା ପବିତ୍ର ଅଟେ।

ରିପୋର୍ଟ ମୁତାବକ, ସୀମା ସୁରକ୍ଷାକୁ ମଜବୁତ କରିବା, ଅର୍ଥନୈତିକ ଏବଂ ସାମାଜିକ ବିକାଶକୁ ସୁଦୃଢ଼ କରିବା, ସୀମା ଅଞ୍ଚଳକୁ ଖୋଲିବା, ଜନସାଧାରଣଙ୍କ ସେବା ଏବଂ ଭିତ୍ତିଭୂମିରେ ଉନ୍ନତି ଆଣିବା, ଏହାକୁ ପ୍ରୋତ୍ସାହନ ଏବଂ ସେଠାକାର ଲୋକଙ୍କ ଜୀବନରେ ଉନ୍ନତି ଆଣିବା ପାଇଁ ଦେଶ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ।

ଦେଶ ସମାନତା, ପାରସ୍ପରିକ ବିଶ୍ୱାସ ଏବଂ ବନ୍ଧୁତ୍ୱପୂର୍ଣ୍ଣ କଥାବାର୍ତ୍ତାର ନୀତି ପାଳନ କରୁଥିବା ପଡୋଶୀ ଦେଶମାନଙ୍କ ସହିତ ଭୂମି ସୀମା ସମସ୍ୟାର ମୁକାବିଲା କରିବ ଏବଂ ଦୀର୍ଘ ବିଚାରାଧୀନ ସୀମା ବିବାଦ ଏବଂ ବିବାଦର ସଠିକ୍ ସମାଧାନ ପାଇଁ ଆପୋଷ ଆଲୋଚନାର ସାହାରା ନେବ।

ଉଲ୍ଲେଖ ଯୋଗ୍ୟ ଯେ, ବେଜିଂ ନିଜର ୧୨ଟି ପଡ଼ୋଶୀ ଦେଶ ସହିତ ସୀମା ବିବାଦ ନେଇ ସମାଧାନ କରିସାରିଛି। କିନ୍ତୁ ଭାରତ ଏବଂ ଭୁଟାନ ସହିତ ସୀମା ସମ୍ବନ୍ଧୀୟ ଚୁକ୍ତିନାମା ଏପର୍ଯ୍ୟନ୍ତ ଚୂଡାନ୍ତ ହୋଇନାହିଁ। ଭାରତ ଏବଂ ଚୀନ୍ ମଧ୍ୟରେ ସୀମା ବିବାଦ ପ୍ରକୃତ ନିୟନ୍ତ୍ରଣ ରେଖାର ୩,୪୮୮ କିଲୋମିଟର ଅଞ୍ଚଳରେ ଥିବାବେଳେ ଭୁଟାନ ସହିତ ବିବାଦ ୪୦୦ କିଲୋମିଟର ସୀମାରେ ରହିଛି।

The post ଭାରତ ସହ ବିବାଦ ଭିତରେ ନୂଆ ‘ଲ୍ୟାଣ୍ଡ ବର୍ଡର ଲ’ ଆଣିଲା ଚୀନ୍‌ appeared first on Odisha Reporter.

from Odisha Reporter https://ift.tt/3m6tVba