ପାଣ୍ଡିଆନଙ୍କ ସୁରକ୍ଷାକର୍ମୀଙ୍କ ଗାଡ଼ି ଧକ୍କାରେ ଜଣେ ମୃତ, ଗିରଫ ଦାବି କଲା କଂଗ୍ରେସ

ବିଜେଡି ନେତା ଭିକେ ପାଣ୍ଡିଆନଙ୍କ ସୁରକ୍ଷାକର୍ମୀଙ୍କ ଗାଡ଼ି ଧକ୍କାରେ ଜଣେ ବ୍ୟକ୍ତିଙ୍କ ମୃତ୍ୟୁ ହେବାକୁ ନେଇ ବିବାଦ ବଢ଼ିବାରେ ଲାଗିଛି । କଂଗ୍ରେସ ଆଜି ପାଣ୍ଡିଆନଙ୍କ ବିରୁଦ୍ଧରେ ମାମଲା ସହ ଗିରଫ ଦାବି କରିଛି । ଏହାସହିତ ମୃତକଙ୍କ ପରିବାରକୁ ଏକ କୋଟି ଟଙ୍କା କ୍ଷତିପୂରଣ ଦେବାକୁ ଦାବି କରିଛି ।

ପିସିସି ପ୍ରଚାର କମିଟି ଅଧ୍ୟକ୍ଷ ବିଜୟ କୁମାର ପଟ୍ଟନାୟକ ଆଜି ନିଜ ଏକ୍ସ ହ୍ୟାଣ୍ଡଲରେ ଟ୍ୱିଟ୍ କରି କହିଛନ୍ତି ଯେ, ଗଜପତି ଜିଲ୍ଲା ପରିସଲ ଗାଁର ସରସ ଆନନ୍ଦଙ୍କ ମୃତ୍ୟୁ ଅତ୍ୟନ୍ତ ଦୁଃଖଦାୟକ । ତାଙ୍କ ପରିବାର ପ୍ରତି ସେ ସମବେଦନା ପ୍ରକଟ କରିବା ସହ ସରକାର ତୁରନ୍ତ ଏକ କୋଟି ଟଙ୍କାର ସହାୟତା ଘୋଷଣା ପାଇଁ ସେ ଦାବି କରିଛନ୍ତି । ଦୁର୍ଘଟଣା ଘଟାଇ ଭିକେ ପାଣ୍ଡିଆନ ଘଟଣା ସ୍ଥଳରୁ ପଳାଇ ଆସିବା କାପୁରୁଷତା ଓ ଅମାନବୀୟତାର ନିଦର୍ଶନ । ତାଙ୍କ ବିରୁଦ୍ଧରେ ମକଦ୍ଦମା ହେବା ଉଚିତ୍ ବୋଲି କହିବା ସହ ତାଙ୍କର ଗିରଫ ଦାବି କରିଛନ୍ତି ।

ଉଲ୍ଲେଖଯୋଗ୍ୟ, ପାଣ୍ଡିଆନ ଆଜି ଦିନିକିଆ ଗଜପତି ଜିଲ୍ଲା ଗସ୍ତରୁ ଫେରିବା ବାଟରେ ମୋହନା ରାମଗିରିସ୍ଥିତ ପରିସଲ ଗାଁଠାରେ ବିଶ୍ରାମ ଘର ନିକଟରେ ଛିଡ଼ା ହୋଇଥିବା ସରସ ଆନନ୍ଦଙ୍କୁ ପାଣ୍ଡିଆନଙ୍କ ସୁରକ୍ଷାକର୍ମୀଙ୍କ ଗାଡ଼ି ଧକ୍କା ଦେଇଥିଲା । ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା ଓ ଉତ୍ତ୍ୟକ୍ତ ଲୋକଙ୍କୁ ପୁଲିସ ବୁଝାସୁଝା କରିବା ପରେ ମାମଲା ଶାନ୍ତ ପଡ଼ିଥିଲା ।

from Latest Odisha Reporter News, Breaking News Today | Top Updates on Corona - OR News https://ift.tt/L7iuOq6