ହନିମୁନ୍‌ ଟ୍ରିପ୍‌ ପାଇଁ ସମ୍ପୂର୍ଣ୍ଣ ଟ୍ରେନ୍‌କୁ ବୁକିଂ କଲେ ବ୍ରିଟିଶ୍ ଦମ୍ପତି

ଭୁବନେଶ୍ୱର(ଓଡ଼ିଶା ରିପୋର୍ଟର୍‌): ଦକ୍ଷିଣ ଭାରତର ନୀଳଗିରି ପର୍ବତମାଳାରେ ହନିମୁନ୍‌ କରିବା ପାଇଁ ଭାରତୀୟ ରେଳବାଇ ପକ୍ଷରୁ ଚାଲୁଥିବା ସ୍ୱତନ୍ତ୍ର ଟ୍ରେନ୍‌କୁ ସଂପୂର୍ଣ୍ଣ ବୁକିଂ କରି ଏକ ନବବିବାହିତ ବ୍ରିଟିଶ୍ ଦମ୍ପତି ଏବେ ଚର୍ଚ୍ଚା ସୃଷ୍ଟି କରିଛନ୍ତି।

ନୀଳଗିରି ପର୍ବତମାଳା ଭ୍ରମଣ ପାଇଁ ଭାରତୀୟ ଦକ୍ଷିଣତଟ ରେଳବାଇ ପକ୍ଷରୁ ମିଟ୍ଟୁପଲାୟମ୍‌ରୁ ଉଡାଙ୍ଗମଣ୍ଡଳମ୍‌(ଉଟି) ଯାଏ ଚାଲୁଥିବା ସ୍ୱତନ୍ତ୍ର ଟ୍ରେନ୍‌ର ସମସ୍ତ ବଗିକୁ କେବଳ ଯିବା ପାଇଁ ଏହି ବ୍ରିଟିଶ୍‌ ଦମ୍ପତି ବୁକିଂ କରିଥିଲେ। ଏହି ବାବଦରେ ଏହି ଦମ୍ପତି ଭାରତୀୟ ରେଳବାଇକୁ ସମୁଦାୟ ୩ ଲକ୍ଷ ଟଙ୍କା ଦେଇଛନ୍ତି। ସ୍ୱତନ୍ତ୍ର ଟ୍ରେନ୍‌କୁ ଏଭଳି ୱାନ୍‌ ୱେ ବୁକିଂ କରିବାରେ ଏହି ଦମ୍ପତି ପ୍ରଥମ ବୋଲି କୁହାଯାଉଛି।

ଏହି ନବବିବାହିତ ବ୍ରିଟିଶ୍‌ ଦମ୍ପତି ହେଉଛନ୍ତି ଗ୍ରାହାମ୍‌ ୱିଲିୟମ୍‌ ଲିନ୍(୩୦) ଏବଂ ସିଲ୍‌ଭିୟା ପ୍ଲାସିକ୍‌। ନିକଟରେ ସେ ଦୁହେଁ ବିବାହ କରିଛନ୍ତି। ତେବେ ସେମାନଙ୍କ ହନିମୁନ୍‌କୁ ସ୍ୱତନ୍ତ୍ର ଏବଂ ସ୍ମରଣୀୟ କରିବା ପାଇଁ ସେମାନେ ଭାରତୀୟ ରେଳବାଇ ଏବଂ ଟୁରିଜିମ୍‌ କର୍ପୋରେସନ୍‌ ୱେବ୍‌ସାଇଟ୍‌ ଜରିଆରେ ଏହି ସ୍ୱତନ୍ତ୍ର ଟ୍ରେନ୍‌ର ସମସ୍ତ ବଗିକୁ ବୁକ୍‌ କରିଥିଲେ।

ଏଭଳି ନିଆରା ଓ ସ୍ମରଣୀୟ ଯାତ୍ରାରେ ବାହାରିବାବେଳେ ଏହି ବ୍ରିଟିଶ୍‌ ଦମ୍ପତିଙ୍କୁ ମିଟ୍ଟୁପଲାୟମ୍‌ ଏବଂ କୁନୁର୍‌ ଷ୍ଟେସନ୍‌ରେ ଶୁକ୍ରବାର ଭାରତୀୟ ରେଳବାଇ ପକ୍ଷରୁ ଭବ୍ୟ ସମ୍ବର୍ଦ୍ଧନା ମଧ୍ୟ ଦିଆଯାଇଥିଲା।  ନବବିବାହିତଙ୍କୁ ଧରି ଟ୍ରେନ୍‌ଟି ମିଟ୍ଟୁପଲାୟମ୍‌ ଷ୍ଟେସନ୍‌ରୁ ସକାଳ୯ଟା ୧୦ରେ ଛାଡ଼ି ଉଟିରେ ଅପରାହ୍ନ ୨ଟା ୪୦ ମିନିଟ୍‌ରେ ପହଞ୍ଚିଥିଲା।

ହିଲ୍‌ ଟୁରିଜିମ୍‌ର ପ୍ରସାର ପାଇଁ ଭାରତୀୟ ରେଳବାଇ ବୋର୍ଡ୍‌ ସାଲେମ୍‌ ଡିଭିଜନ୍‌କୁ ନୀଳଗିରି ପର୍ବତାଞ୍ଚଳରେ ୧୨୦ଯାତ୍ରୀଙ୍କ ପାଇଁ ଉଦ୍ଦିଷ୍ଟ ଏହି ସ୍ୱତନ୍ତ୍ର ଟ୍ରେନ୍‌ର ପରିଚାଳନା ଭାର ଦେଇଛି।

from Odisha Reporter https://ift.tt/2NCJSC7