‘ପଦ୍ମ’ ଧରିଲେ ପଦ୍ମ ଲୋଚନ ପଣ୍ଡା, ବିଜେଡି ସରକାର ହଟାଇବାକୁ ଧର୍ମେନ୍ଦ୍ରଙ୍କ ଆହ୍ଵାନ

ଖଇରା.(ଓଡ଼ିଶା ରିପୋର୍ଟର): ବାଲେଶ୍ୱର ଜିଲ୍ଲାର ଖଇରା ଠାରେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ପଦ୍ମଲୋଚନ ପଣ୍ଡା​ ତାଙ୍କର ଶହଶହ ସମର୍ଥକ, ଜିଲ୍ଲା ପରିଷଦ ସଦସ୍ୟ, ସରପଞ୍ଚ, ସମିତି ସଭ୍ୟ, ପୂର୍ବତନ​ ପଞ୍ଚାୟତ ସମିତି ଅଧ୍ୟକ୍ଷ ଓ ଜିଲ୍ଲା ପରିଷଦ ଉପାଧ୍ୟକ୍ଷଙ୍କ ସହିତ ବିଜେପିରେ ଯୋଗ ଦେଇଛନ୍ତି। ଆଉ ଜଣେ​ ବରିଷ୍ଠ କଂଗ୍ରେସ ନେତା ଶୁଭଙ୍କର ମହାପାତ୍ର ମଧ୍ୟ ଏହି ଅବସରରେ ବିଜେପିରେ ଯୋଗ ଦେଇଛନ୍ତି ।

ଏଥିପାଇଁ ଏଠାରେ ଆୟୋଜିତ କାର୍ଯ୍ୟକ୍ରମରେ ଉଦବୋଧନ ଦେଇ ଶ୍ରୀ ପ୍ରଧାନ କହିଛନ୍ତି କେବଳ ରାଜନୈତିକ ପରିବର୍ତ୍ତନ ନୁହେଁ ଓଡିଶାର​ ଦୃତ ବିକାଶ ହିଁ ବିଜେପିର ଲକ୍ଷ୍ୟ।

ସେ କହିଛନ୍ତି, ” ଭାରତୀୟ ଜନତା ପାର୍ଟିର ସଂଘର୍ଷ କେବଳ ରାଜ୍ୟରେ​ ସରକାର ପରିବର୍ତ୍ତନ ପାଇଁ ନୁହେଁ କିମ୍ବା କେଉଁ ବ୍ୟକ୍ତିଙ୍କୁ ବିଧାୟକ ବା ମନ୍ତ୍ରୀ କରିବାରେ ସୀମିତ ନୁହେଁ। ୨୦ ବର୍ଷର ଲମ୍ବା ନବୀନ ପଟ୍ଟନାୟକଙ୍କ ଶାସନ ଓଡିଶାର ମଙ୍ଗଳ କରିବା ବଦଳରେ ଚାଷୀ, ଗରିବ, ଆଦିବାସୀ, ମହିଳା ଓ ଯୁବକଙ୍କ ସ୍ୱାର୍ଥ ବିରୋଧୀ ହୋଇ ରହିଛି।”

ପୁଣି ଓଡିଶାକୁ ବିକାଶର ଶୀର୍ଷରେ ନେବା ପାଇଁ ନରେନ୍ଦ୍ର ମୋଦିଙ୍କ ନେତୃତ୍ୱକୁ ଆଗକୁ ନେବା ସହ ମୋଦି ବିଚାରରେ ବିଶ୍ୱାସ କରୁଥିବା ରାଜ୍ୟ ସରକାର ଗଢିବାକୁ ପଡିବ ବୋଲି ଶ୍ରୀ​ ପ୍ରଧାନ କହିଛନ୍ତି। ସେ କହିଛନ୍ତି, ପାଖ ଜିଲ୍ଲା ମୟୂରଭଞ୍ଜରେ ଯେତିକି ଜମି ଅଛି ତା ଠାରୁ ଅଧିକ ଚାରା​ ଲଗାଇ ଅର୍ଥକୁ ହରିଲୂଟ କରା ଯାଇଥିବା କଥା ଶାସକ ଦଳର ବରିଷ୍ଠ ମନ୍ତ୍ରୀ ଅଭିଯୋଗ ଆଣିଛନ୍ତି।​ ଶାସକ ଦଳର ଜଣେ ପୂର୍ବତନ ସାଂସଦ ରାଜ୍ୟର ଖଣି ଖାଦାନ ଲୁଟରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର​ ବରିଷ୍ଠ ଅଫିସରଙ୍କୁ ସିଧା ସିଧା ଦୋଷୀ ବୋଲି ଅଭିଯୋଗ କରିଛନ୍ତି।​ ତିତଲି ମହାବାତ୍ୟା ପରିଚାଳନାରେ ଜିରୋ କାଜୁଆଲିଟିର ଅହଂକାରରେ କେବଳ ଗଜପତି ଜିଲ୍ଲାରେ​ ଶହେରୁ ଅଧିକ ଲୋକ ମୃତ୍ୟୁ ବରଣ କରିଥିବା ସ୍ଥାନୀୟ ଲୋକ ଅଭିଯୋଗ କରୁଥିବା ଶ୍ରୀ ପ୍ରଧାନ କହିଛନ୍ତି।

ଶ୍ରୀ ପ୍ରଧାନ କହିଛନ୍ତି ଯେ ଲମ୍ବା ସମୟ ଧରି ଚାଲୁଥିବା ନବୀନ ପଟ୍ଟନାୟକଙ୍କ ସରକାର ରାଜ୍ୟର​ ସମ୍ପଦକୁ ବ୍ୟବହାର କରି ଯୁବପିଢ଼ି ପାଇଁ ରୋଜଗାର ସୁଯୋଗ ସୃଷ୍ଟି କରି ବିକାଶର ରାସ୍ତା ଖୋଲିବା​ ବଦଳରେ ରାଜ୍ୟର ସମ୍ପଦକୁ ଲୂଟ କରି ଚାଲିଛନ୍ତି। ସ୍ଥାନୀୟ ସିମୁଳିଆ ଓ​ ଖଇରା ଅଞ୍ଚଳର ଖଣି ଖାଦାନର ମାଲିକ ସ୍ଥାନୀୟ ଯୁବକ ନୁହନ୍ତି, ବରଂ ବିଜେଡି​ ସରକାର ଏହାକୁ ଲୂଟ କରି ନିଜେ ଲାଭବାନ ହେଉଛନ୍ତି। ଏହି ଅଞ୍ଚଳର ଯୁବକ ଏଠାରେ ନିଯୁକ୍ତି ଓ ରୋଜଗାରର ସୁଯୋଗ ନ ପାଇ ବେକାର ବସିବା ବା ବାହାର ରାଜ୍ୟକୁ କାମ କରିବାକୁ ଯିବାକୁ ବାଧ୍ୟ ହେଉଛନ୍ତି ବୋଲି ସେ କହିଛନ୍ତି।​

from Odisha Reporter https://ift.tt/2R2Jqi4