ସାବରୀମାଲା ବିବାଦ: ନିଜ ରାୟର ପୁନଃସମୀକ୍ଷା କରିବାକୁ ରାଜି ହେଲେ ସୁପ୍ରିମକୋର୍ଟ

ନୂଆଦିଲ୍ଲୀ/ଥିରୁଭନନ୍ତପୁରମ୍‌: କେରଳର ପ୍ରସିଦ୍ଧ ସାବରୀମାଲା ମନ୍ଦିରକୁ ୧୦ରୁ ୫୦ ବର୍ଷ ବୟସର ମହିଳାଙ୍କ ପ୍ରବେଶ ପାଇଁ ଦେଇଥିବା ଅନୁମତି ପୁଣିଥରେ ବିଚାର କରିବାକୁ ଆଜି ସୁପ୍ରିମକୋର୍ଟ ରାଜି ହୋଇଛନ୍ତି।

ଶହଶହ ବର୍ଷ ଧରି ପ୍ରଭୁ ଆୟପ୍ପାଙ୍କ ଦର୍ଶନରୁ ମାସିକ ଋତୁଶ୍ରାବର ସମ୍ମୁଖୀନ ହେଉଥିବା ମହିଳାମାନେ ବଞ୍ଚିତ ହେଉଥିଲେ। ତେବେ ସୁପ୍ରିମକୋର୍ଟ ଏହି ପରମ୍ପରାକୁ ଭାଙ୍ଗିଥିଲେ। କିନ୍ତୁ ଏହା ବିରୋଧରେ ୪୯ଟି ଆବେଦନ ହେବାରୁ ଆଜି ପ୍ରଧାନ ବିଚାରପତି ଜଷ୍ଟିସ୍‌ ରଞ୍ଜନ ଗୋଗୋଇଙ୍କ ଖଣ୍ଡପୀଠ ଏହାର ଶୁଣାଣି କରି ଆସନ୍ତା ଜାନୁଆରୀ ୨୨ରେ ଏହାର ପରବର୍ତ୍ତୀ ଶୁଣାଣି ଓପନ କୋର୍ଟରେ କରାଯିବ ବୋଲି କହିଛନ୍ତି।

ସେପ୍ଟେମ୍ବର ମାସରେ ସୁପ୍ରିମକୋର୍ଟ ମନ୍ଦିରକୁ ସବୁ ବୟସର ମହିଳାମାନେ ପ୍ରବେଶ କରିପାରିବେ ବୋଲି କହିଥିଲେ। କିନ୍ତୁ ଏହାକୁ ବିରୋଧ କରି ସେବେଠାରୁ ଶହଶହ ଲୋକ ସାବରୀମାଲା ମନ୍ଦିର ଆଗରେ ବିକ୍ଷୋଭ କରିବା ସହ ୧୦ରୁ ୫୦ ବର୍ଷର ମହିଳାଙ୍କୁ ପ୍ରବେଶ କରିବାକୁ ଅନୁମତି ଦେଇ ନଥିଲେ।

ଏହାକୁ ନେଇ ବେଶ ଛକାପଞ୍ଝା ଏବଂ ରାଜନୀତିକ ହଟଚମଟ ମଧ୍ୟ ଦେଖିବାକୁ ମିଳିଥିଲା। ଶେଷରେ ମାମଲା ପୁଣିଥରେ ସୁପ୍ରିମକୋର୍ଟରେ ଆସି ପହଞ୍ଚିଛି।

from Odisha Reporter https://ift.tt/2qJ3HxO