ଆଗ୍ରାର ନାଁ ବଦଳାଇବାକୁ ଦାବି କଲା ବିଜେପି

ଲକ୍ଷ୍ନୌ: ଉତ୍ତର ପ୍ରଦେଶର କ୍ଷମତାସୀନ ଯୋଗୀ ଆଦିତ୍ୟନାଥ ସରକାର ଆହ୍ଲାବାଦର ନାଁକୁ ପ୍ରୟାଗରାଜ ଓ ଫୈଜାବାଦକୁ ଅଯୋଧ୍ୟା ଭାବେ ନାମିତ କରିବା ପରେ ରାଜ୍ୟର ଆଉ କିଛି ସହରର ନାଁକୁ ବଦଳାଇବାକୁ ଖୋଦ୍‌ ସରକାରୀ ଦଳ ବିଜେପି ଦାବି କରିଛି।

ବିଜେପି ବିଧାୟକ ଜଗନ ପ୍ରସାଦ ଗର୍ଗ ଏବେ ଆଗ୍ରାର ନାଁକୁ ବଦଳାଇବାକୁ ଯୋଗୀ ସରକାରଙ୍କ ନିକଟରେ ଦାବି କରିଛନ୍ତି। ଆଗ୍ରାର ନାଁକୁ ଆଗ୍ରାବନ୍‌ କିମ୍ବା ଅଗ୍ରୱାଲ ନାଁରେ ନାମିତ କରିବାକୁ ସେ କହିଛନ୍ତି।

ଆଗ୍ରା ଉତ୍ତର ନିର୍ବାଚନ ମଣ୍ଡଳୀର ଏହି ବିଧାୟକ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, “ଆଗ୍ରା ଶବ୍ଦର ମାନେ କିଛି ନାହିଁ। ଆଗ୍ରା ଶବ୍ଦର ଅର୍ଥ ଆପଣ ଯେଉଁଠି ବି ଖୋଜିବେ ପାଇବେ ନାହିଁ। ଏଭଳି ନାଁ କ’ଣ ପ୍ରମାଣିତ କରୁଛି? ପୂର୍ବରୁ ଏଠାରେ ଅନେକ ଜଙ୍ଗଲ ଥିଲା। ଅଗ୍ରୱାଲ ସଂପ୍ରଦାୟର ଲୋକମାନେ ଏଠାରେ ରହୁଥିଲେ। ତେଣୁ ଏବେ ଆଗ୍ରାକୁ ଆଗ୍ରା-ବନ କିମ୍ବା ଅଗ୍ର-ୱାଲ ଭାବେ ନାମିତ କରାଯିବା ଦରକାର।”

ଆଉ ଜଣେ ବିଜେପି ବିଧାୟକ ସଙ୍ଗୀତ ସୋମ କହିଛନ୍ତି, ମୁଜାଫରନଗରର ନାଁକୁ ଲକ୍ଷ୍ମୀ ନଗର ଭାବେ ନାମିତ କରାଯିବା ଦରକାର। ଏଭଳି ନାଁ ପାଇଁ ଲୋକମାନେ ଦାବି କରୁଛନ୍ତି। ବିଜେପି ବର୍ତ୍ତମାନ ସବୁ ସହରର ନାଁକୁ ବଦଳାଇ ଭାରତୀୟ ସଂସ୍କୃତିକୁ ପୁଣି ପ୍ରଚଳନ କରିବାକୁ ଚାହୁଁଛି। ହିନ୍ଦୁତ୍ୱବାଦକୁ ସମାପ୍ତ କରି ମୁସଲିମ୍‌ ଶାସକମାନେ ଏଭଳି ଭାରତୀୟ ସହରର ନାଁକୁ ବଦଳାଇ ଥିଲେ। ତେଣୁ ବିଜେପି ଏବେ ଦେଶକୁ ସୁରକ୍ଷିତ କରିବା ପାଇଁ ଏଭଳି ନାଁକୁ ବଦଳାଇବା ଆରମ୍ଭ କରିଛି। ଦେଶର ଅନେକ ସହରର ନାଁକୁ ବଦଳାଇବାର ସମୟ ଆସିଯାଇଛି ବୋଲି ସେ କହିଛନ୍ତି।

from Odisha Reporter https://ift.tt/2qExoAi