“ବନ୍ଦେ ମାତରମ୍‌ ଗାଉନଥିବା ବ୍ୟକ୍ତିଙ୍କ ସାମ୍ନାରେ ମୁଁ ଶପଥ ନେବିନି”

ନୂଆଦିଲ୍ଲୀ: ତେଲେଙ୍ଗାନା ବିଧାନସଭା ନିର୍ବାଚନରେ ବିଜେପିରୁ ଏକମାତ୍ର ବିଧାୟକ ଭାବେ ନିର୍ବାଚିତ ହୋଇଥିବା ରାଜା ସିଂହ ଶପଥ ଗ୍ରହଣ କରିବାପାଇଁ ଏକ ଅଜବ ସର୍ତ୍ତ ରଖିଛନ୍ତି। ବର୍ତ୍ତମାନ ବିଧାୟକମାନଙ୍କୁ ଶପଥ ପାଠ କରାଇବାକୁ ଥିବା ପ୍ରୋଟେମ୍‌ (ଅସ୍ଥାୟୀ) ବାଚସ୍ପତି ତଥା ଏଆଇଏମ୍‌ଆଇଏମ୍‌ ବିଧାୟକ ମୁମ୍‌ତାଜ୍‌ ଅହମ୍ମଦ ଖାନ୍‌ଙ୍କ ସାମ୍ନାରେ ସେ ଶପଥ ନେବେନି ବୋଲି କହିଛନ୍ତି।

ଏହି ବିବାଦୀୟ ବିଧାୟକ ଟ୍ୱିଟରରେ ଏକ ଭିଡିଓ ଅପ୍‌ଲୋଡ୍‌ କରି କହିଛନ୍ତି, “ମୁଁ ସେହି ଅସ୍ଥାୟୀ ବାଚସ୍ପତିଙ୍କଠାରୁ ଶପଥ ନେବାକୁ ଚାହୁଁନି, ଯାହାର ଦଳ ହିନ୍ଦୁମାନଙ୍କୁ ଶେଷ କରିବାକୁ ଚାହେଁ। ସେମାନେ କେବେ ମଧ୍ୟ ବନ୍ଦେ ମାତରମ୍‌ ଗାଆନ୍ତିନି ଏବଂ ଭାରତ ମାତାକୀ ଜୟ କୁହନ୍ତିନି।”

ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଏଆଇଏମ୍‌ଆଇଏମ୍‌କୁ ବନ୍ଧୁତ୍ୱପୂର୍ଣ୍ଣ ଦଳ ବୋଲି କହିଥିଲେ, ଯାହାକି ପୂର୍ବରୁ ଜିତିଥିବା ୭ଟିଯାକ ଆସନରେ ନିଜ ସ୍ଥିତି ଅକ୍ଷୁର୍ଣ ରଖିପାରିଛି। ଅନ୍ୟପକ୍ଷରେ ଏହି ବନ୍ଧୁତା ଦାୟରେ ଶ୍ରୀ ରାଓ ଅସାଦୁଦ୍ଦିନ୍‌ ଓୱେସିଙ୍କ ଦଳରୁ ହିଁ ଅସ୍ଥାୟୀ ବାଚସ୍ପତି ବାଛିଥିଲେ। ପରେ ଓୱେସି ଶ୍ରୀ ରାଓଙ୍କୁ ଏଥିପାଇଁ ଧନ୍ୟବାଦ ଜଣାଇଛନ୍ତି।

from Odisha Reporter http://bit.ly/2RCTdiw