ଆନ୍ଧ୍ରରେ ଓଡ଼ିଶା ଖାଦ୍ୟର ମଜା ନେଲେ ପ୍ରବାସୀ ଓଡ଼ିଆ

ବିଶାଖାପାଟଣା (ଯଶୋବନ୍ତ ନାରାୟଣ ପାଢୀ): ବିଶାଖାପାଟଣାରେ ଓଡ଼ିଶାର ପିଠା ଓ ମିଠାର ସ୍ୱାଦ ନେଲେ ପ୍ରବାସୀ ଓଡ଼ିଆ। ଦଶପଲ୍ଲା ହିଲ୍‌ସ ନିକଟ ଜଗନ୍ନାଥ ମନ୍ଦିରରେ ହୋଇଥିଲା ଉତ୍କଳ ଦିବସ ଅବସରରେ ଓଡ଼ିଆ ଫୁଡ୍ ଫେଷ୍ଟିଭାଲ୍ ଆୟୋଜନ ହୋଇଥିଲା। ଦୂରଦୂରାନ୍ତରେ ବାସ କରୁଥିବା ଓଡ଼ିଆ ଓ ଆନ୍ଧ୍ରପ୍ରଦେଶର ଲୋକେ ଏହି ଖାଦ୍ୟର ମଜା ନେଇଥିଲେ।

ଓଡ଼ିଆ ଫୁଡ୍ ଫେଷ୍ଟିଭାଲରେ ଓଡ଼ିଶାର ଅନେକ ପାରମ୍ପରିକ ପିଠା ଓ ମିଠାର ଝଲକ ଦେଖିବାକୁ ମିଳିଥିଲା। ଯେପରି ମଣ୍ଡା, କାକରା, ପୋଡ଼ପିଠା ସହ ଘୁଗୁନି, ଦହିବରା ଓ ମୁଢି ଘୁଗୁନିର ମଜା ନେଇଥିଲେ ଦର୍ଶକ। ଏହାସହ ରସଗୋଲା, ଛେନାପୋଡ ଓ ଛେନାଝିଲ୍ଲୀ ଭଳି ବିଭିନ୍ନ ପ୍ରକାରର ମିଠା ପ୍ରଦର୍ଶିତ ମଧ୍ୟ ହୋଇଥିଲା। ଏହି ସମସ୍ତ ପିଠା ଓ ମିଠା ବିଶାଖାପାଟଣାରେ ରହୁଥିବା ଓଡ଼ିଆ ମହିଳା ନିଜ ଘରେ ପ୍ରସ୍ତୁତ କରି ଆଣିଥିଲେ। ମାତ୍ର ଦୁଇ ଘଣ୍ଟା ମଧ୍ୟରେ ସବୁ ପିଠା ଓ ମିଠା ଶେଷ ହୋଇଯାଇଥିଲା। ବିଶାଖାପାଟଣାରେ ଓଡ଼ିଶା ମାଟିର ସ୍ୱାଦ ଚାଖିଥିଲେ ସ୍ଥାନୀୟ ଲୋକେ।

ଫୁଡ୍‌ ଫେଷ୍ଟିଭାଲରେ ୧୦ଟି ଷ୍ଟଲରେ ପ୍ରଦର୍ଶିତ ହୋଇଥିଲା ଏହି ସବୁ ପିଠା ଓ ମିଠା। ଫୁଡ୍ ଫେଷ୍ଟିଭାଲରେ ପ୍ରାୟ ୨ ହଜାରରୁ ଅଧିକ ଓଡ଼ିଆ ସାମିଲ ହୋଇଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ହୋଇଥିଲା। ଓଡ଼ିଶାର ଉତ୍କଳ ଡ୍ୟାନ୍ସ ଓ ରିସର୍ଚ୍ଚ ଏକାଡେମୀର କଳାକାରମାନେ ନୃତ୍ୟ ଓ ସଂଗୀତ ପରିବେଷଣ କରିଥିଲେ। ବିଶାଖାପାଟଣାରେ ଓଡ଼ିଆ ସଂସ୍କୃତି ଓ କଳାର ସଂରକ୍ଷଣରେ ପ୍ରୟାସ ଜାରି ରଖିଥିବା ଉତ୍କଳ ସାଂସ୍କୃତିକ ସମାଜର କିଛି ସଦସ୍ୟଙ୍କୁ ଏହି ଅବସରରେ ସମ୍ମାନିତ କରାଯାଇଥିଲା।

from Odisha Reporter https://ift.tt/2CRBAmO