ତୃତୀୟ ଦିନ ପାଇଁ ସୋନପୁର ସବୁଠୁ ଥଣ୍ଡା ସହର

ଭୁବନେଶ୍ୱର( ଓଡ଼ିଶା ରିପୋର୍ଟର): ଅସହ୍ୟ ଶୀତରେ ଥରୁଛି ସାରା ଓଡ଼ିଶା । ଶୀତର ଲହରି ଆହୁରି ୨ ଦିନ ଯାଏ ରାଜ୍ୟକୁ ଥରାଇବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ଆଜି ରାଜ୍ୟର ୧୬ ସହର ୧୦ ଡିଗ୍ରୀ ତଳେ ରହିଛି । ଲଗାତାର ତୃତୀୟ ଦିନ ପାଇଁ ସୋନପୁର ସବୁଠୁ ଥଣ୍ଡା ସହର ଭାବେ ପରିଗଣିତ ହୋଇଛି । ଏଠାରେ ସର୍ବନିମ୍ନ ତାପମାତ୍ରା ୫.୪ ଡିଗ୍ରୀ ରହିଛି। ଗତକାଲି ସୋନପୁର ତାପମାତ୍ରା ୩.୪ ଡିଗ୍ରୀ ଥିବା ବେଳେ ତା’ ପୂର୍ବ ଦିନ ୪ ଡିଗ୍ରୀ ତାପମାତ୍ରା ରହିଥିଲା।

ଏହାବ୍ୟତୀତ ଆଜି ୫.୬ ଡିଗ୍ରୀ ସହ ଅନୁଗୁଳ ଦ୍ୱିତୀୟ ସ୍ଥାନରେ ଓ  ଫୁଲବାଣୀ ୬.୩ ଡିଗ୍ରୀ ସହ ତୃତୀୟ ସ୍ଥାନରେ ରହିଛି। ଟିଟିଲାଗଡ଼ ୬.୫, ଦାରିଙ୍ଗବାଡ଼ି ୭, କେନ୍ଦୁଝର ୮.୪ ଡିଗ୍ରୀ, ବଲାଙ୍ଗିର ୮.୫, ବାଲେଶ୍ୱର ୮.୫, ସୁନ୍ଦରଗଡ଼ ୮.୫ ଡିଗ୍ରୀ, ସମ୍ବଲପୁରର ତାପମାତ୍ର ୮.୭ ଡିଗ୍ରୀ ରହିଛି। ସେହିପରି ଝାରସୁଗୁଡ଼ା ୮.୯, ଭବାନୀପାଟଣା  ୯ ଡିଗ୍ରୀ, କୋରାପୁଟ ୯.୨, ବାରିପଦା, ୯.୪, ତାଳଚେର ୯.୪ ଡିଗ୍ରୀ,କଟକ ୯.୫, ଭୁବନେଶ୍ୱରର ତାପମାତ୍ରା ୧୦.୬ ଡିଗ୍ରୀ ରହିଛି।

ଅସହ୍ୟ ଜାଡ଼ ଯୋଗୁଁ ୧୩ଟି ଜିଲ୍ଲାକୁ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ସେହି ଜିଲ୍ଲାଗୁଡିକ ହେଲା ସୁନ୍ଦରଗଡ଼, ଦେବଗଡ଼, କେନ୍ଦୁଝର, ବାଲେଶ୍ୱର, ଅନୁଗୁଳ, ଢେଙ୍କାନାଳ, ସୋନପୁର, ବୌଦ୍ଧ, କଟକ, ପୁରୀ, ଖୋର୍ଦ୍ଧା, କଳାହାଣ୍ଡି ଓ ବଲାଙ୍ଗିର  ।

ସୁନ୍ଦରଗଡ଼ ଜିଲ୍ଲାର କୋଇଡ଼ା, ଟେନ୍ସା, ଡେଙ୍ଗୁଲା, କଲମଙ୍ଗ, କଳାଟା, ମାଲଦା, ସାନ ଇନ୍ଦୁପୁର ସହିତ କେନ୍ଦୁଝର ଓ ବରଗଡ଼ ଜିଲ୍ଲାର କିଛି ସ୍ଥାନରେ ସକାଳୁ ବରଫର ଆସ୍ତରଣ ଦେଖିବାକୁ ମିଳିଥିଲା ।

 

from Odisha Reporter https://ift.tt/354pQbD