୩ ନୂଆ ଜିଲ୍ଲାରେ ପାଦ ଦେଲା କରୋନା; ୧୨୨ରେ ପହଞ୍ଚିଲା ଆକ୍ରାନ୍ତଙ୍କ ସଂଖ୍ୟା

ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟ ଆଉ ତିନି କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏହାକୁ ମିଶାଇ ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୧୨୨ରେ ପହଞ୍ଚିଛି। ଏହି ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି।

ନୂଆ ଚିହ୍ନଟ ହୋଇଥିବା କରୋନା ଆକ୍ରାନ୍ତମାନେ କେନ୍ଦୁଝର, ଦେବଗଡ଼ ଓ ଝାରସୁଗୁଡ଼ା ଜିଲ୍ଲାର ବୋଲି ଜଣାପଡ଼ିଛି। ଏହି ସବୁ ଜିଲ୍ଲାରୁ ପ୍ରଥମ ଥର ପାଇଁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସମସ୍ତ ୩ ଆକ୍ରାନ୍ତ ପଶ୍ଚିମବଙ୍ଗ ଫେରନ୍ତା ବୋଲି ସୂଚନା ଦେଲେ ରାଜ୍ୟ ସରକାର। ସେମାନଙ୍କ ମଧ୍ୟରେ କେନ୍ଦୁଝରର ଜଣେ ବୃଦ୍ଧ ଥିବା ବେଳେ ଦେବଗଡ଼ର ଜଣେ ଯୁବକ, ଝାରସୁଗୁଡ଼ାର ଜଣେ ଯୁବତୀ ଅଛନ୍ତି।

କେନ୍ଦୁଝର ଆକ୍ରାନ୍ତଙ୍କ ବୟସ ୬୦ ବର୍ଷ ହୋଇଥିବା ବେଳେ ତାଙ୍କ ଘର ଘସିପୁରା ଥାନା ପଞ୍ଚପଲ୍ଲୀରେ ବୋଲି ଜଣାପଡ଼ିଛି। ସେହିପରି ଦେବଗଡ଼ ଆକ୍ରାନ୍ତଙ୍କ ବୟସ ୩୪ ବର୍ଷ ହୋଇଥିବା ବେଳେ ତାଙ୍କ ଘର ବାସୁଦେବପୁରରେ। ଝାରସୁଗୁଡ଼ାରେ ଆକ୍ରାନ୍ତ ହୋଇଥିବା ଯୁବତୀଜଣକ ୧୮ ବର୍ଷର ହୋଇଥିବା ବେଳେ ତାଙ୍କ ଘର ବ୍ରଜରାଜନଗରରେ ବୋଲି ଜଣାଯାଇଛି। ରାଜ୍ୟର ସମୁଦାୟ ୧୪ଟି ଜିଲ୍ଲାରୁ କରୋନା ଆକ୍ରାନ୍ତ ଚିହ୍ନଟ ହେଲେଣି।  

ସୂଚନାଯୋଗ୍ୟ, ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୧୨୨ରେ ପହଞ୍ଚିଥିବା ବେଳେ ସେମାନଙ୍କ ମଧ୍ୟରୁ ୩୮ସୁସ୍ଥ ହୋଇଛନ୍ତି ଓ ଜଣେ କରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି। ଅନ୍ୟମାନେ ବିଭିନ୍ନ ହସ୍ପିଟାଲରେ ଚିକତ୍ସାଧୀନ ଅଛନ୍ତି।

 

from Odisha Reporter https://ift.tt/3cVg007