ଲକ୍‌ଡାଉନ୍‌କୁ ବିଜେପି ନେତାଙ୍କ ଫୁ, କାର୍ଯ୍ୟାନୁଷ୍ଠାନ ନେବାକୁ ଡରୁଛି ପୁଲିସ୍‌

ବେଙ୍ଗାଲୁରୁ: କର୍ଣ୍ଣାଟକର ଶାସକ ଦଳର ବିଧାୟକ ତଥା ବିଜେପି ନେତା ଏ.ଏସ ଜୟରାମ ଶୁକ୍ରବାର ତାଙ୍କର ଜନ୍ମଦିନ ପାଳନ କରିଛନ୍ତି। ଯେଉଁଥିରେ ପରିବାର ଲୋକଙ୍କ ସହିତ ଶତାଧିକ ଲୋକ ଉପସ୍ଥିତ ଥିଲେ। ଲକଡାଉନ୍ ବେଳେ ଜନ୍ମଦିନ ପାଳନ କରି କେନ୍ଦ୍ର ସରକାରଙ୍କ ନିୟମକୁ ଭାଙ୍ଗିଛନ୍ତି ଏହି ବିଧାୟକ। ଶୁକ୍ରବାର ଦିନ ତୁମକୁରୁ ଜିଲ୍ଲାର ଗୁବି ଥାନା ଅଧିନରେ ଥିବା ଅଙ୍କଲାକୁପେ ଗାଁର ଗୋଟିଏ ଘରେ ଏହି ଜନ୍ମଦିନ ପାଳନ କରିଛନ୍ତି ବିଜେପି ବିଧାୟକ ଏ.ଏସ ଜୟରାମ।

ଜନ୍ମଦିନର କେକ କାଟିଲାବେଳେ ଏହି ବିଜେପି ନେତା ଜଣଙ୍କ କାନ୍ଧରେ ବିଜେପିର ଦଳୀୟ ପତାକାର ଏକ ଉତ୍ତରୀୟ ପକାଇଥିବାବେଳେ ଲୋକଙ୍କ ମଧ୍ୟରେ ଛିଡ଼ା ହୋଇଥିଲେ। ହେଲେ ହାତରେ କିନ୍ତୁ ଗ୍ଲୋଭସ ପିନ୍ଧି ଛୋଟ ଛୁଆଙ୍କୁ କେକ୍ ଦେଉଥିବା ଦେଖିବାକୁ ମିଳିଛି।

ଲକଡାଉନ୍ ବେଳେ କୌଣସି ଧାର୍ମିକ ସମ୍ମିଳନୀ ପାଇଁ ବାରଣ ରହିଥିବାବେଳେ ଏହି ବିଧାୟକ ଜଣଙ୍କ ନିଜ ଜନ୍ମଦିନ ସହିତ ହନୁମାନ ଜୟନ୍ତୀ ମଧ୍ୟ ପାଳନ କରିଛନ୍ତି। ଶତାଧିକ ଲୋକଙ୍କୁ ଅନଞ୍ଜନେୟା ସ୍ୱାମୀ ମନ୍ଦିରରେ ଏକାଠି ବସାଇ ଖାଇବାକୁ ଦେଇଥିବା ଗୁବି ଥାନାଧିକାରୀ ପି.ଏମ୍ ନଗରାଜ କହିଛନ୍ତି। ତେବେ ବିଜେପି ବିଧାୟକ ଜଣଙ୍କ ଲକଡାଉନ୍ ନିୟମ ସହିତ ସାମାଜିକ ଦୂରତ୍ୱକୁ ଉଲ୍ଲଂଘନ କରୁଥିବା ଅଭିଯୋଗକୁ ପୁଲିସ ଅଧିକାରୀ ଜଣଙ୍କ ସ୍ୱୀକାର କରିନାହାନ୍ତି। ରାଜ୍ୟ ଓ କେନ୍ଦ୍ରର ଶାସକ ଦଳର ନେତା ହୋଇଥିବାରୁ ପୁଲିସ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପଛଘୁଞ୍ଚା ଦେଉଥିବା ଜଣାପଡ଼ିଛି। ଅନ୍ୟପଟେ ଗଣମାଧ୍ୟମ ପ୍ରତିନିଧି ଏ ବାବଦରେ ବିଧାୟକଙ୍କ ମତ ଜାଣିବାକୁ ଫୋନ୍ କରିଥିଲେ। ହେଲେ ଗତକାଲି ରାତି ପାଖରୁ ବିଧାୟକଙ୍କ ମୋବାଇଲ୍ ଫୋନ୍ ବନ୍ଦ ରହିଛି।

କର୍ଣ୍ଣାଟକରେ ଏଯାବତ ୨୦୭ ଜଣ କରୋନାରେ ସଂକ୍ରମିତ ହୋଇଥିବାବେଳେ ୧୭୦ଜଣ ଚିକିତ୍ସାଧୀନ ରହିଛନ୍ତି। ୬ ଜଣଙ୍କର ମୃତ୍ୟୁ ଘଟିଛି। ୩୧ ଜଣ ହସ୍ପିଟଲାରୁ ଡିସଚାର୍ଜ ହୋଇଛନ୍ତି।

from Odisha Reporter https://ift.tt/2VjbUI7