ବାରହା ଫାଶରେ ପଡ଼ି ଚାଲିଗଲା ହାତୀ ଛୁଆର ଜୀବନ

ରାଉରକେଲା (ସତ୍ୟାନନ୍ଦ ମହାନ୍ତି): ସୁନ୍ଦରଗଡ଼ ଜିଲ୍ଲା କୁଆଁରମୁଣ୍ଡା ରେଞ୍ଜରୁ ଏକ ହାତୀ ଛୁଆର ମୃତଦେହ ଗତ ଗୁରୁବାର ଉଦ୍ଧାର ହୋଇଥିଲା। ବେକରେ ଲୁହା ତାରର ଫାଶ ଯୋଗୁଁ ହାତୀ ଛୁଆର ମୃତ୍ୟୁ ହୋଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି ।

ଘଟଣାର ତଦନ୍ତ କରୁଥିବା ଏସିଏଫ୍ ଦିଲୀପ ସାହୁଙ୍କ କହିବାନୁଯାୟୀ, ବାରହା ମାରିବାକୁ ଲୋକେ ଏମିତି ଧାରୁଆ ଲୁହା ଫାଶ ପକାଇଥାନ୍ତି । ସେହି ଫାଶରେ ହାତୀଟି ପଡ଼ି ଯାଇଥିବା ଅନୁମାନ କରାଯାଉଛି । ବେକରେ କଟା ଦାଗ ମଧ୍ୟ ଅଛି ।

ଗତକାଲି ସନ୍ଧ୍ୟାରେ ହାତୀ ଛୁଆର ମୃତଦେହର ପୋଷ୍ଟମର୍ଟମ କରାଯାଇଛି । ଏହାର ରିପୋର୍ଟ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ଜଣାପଡ଼ିବ। ଏହି ଘଟଣାକୁ ଗୁରୁତର ସହିତ ନେଇ ତଦନ୍ତ କରୁଛି ବନ ବିଭାଗ ।

କିଛି ଦିନ ତଳେ କେରଳରେ ହାତୀକୁ ସପୁରୀରେ ବାଣ ଭର୍ତ୍ତି କରି ଖାଇବାକୁ ଦିଆଯାଇଥିଲା । ଏଥିରେ ମାଈ ହାତୀ ଓ ତା ଗର୍ଭରେ ଥିବା ହାତୀ ଛୁଆର ମୃତ୍ୟୁ ହୋଇଥିଲା । ସାରା ଦେଶରେ ଏହାକୁ ନେଇ ଆଲୋଡନ ସୃଷ୍ଟି ହୋଇଥିବା ବେଳେ ଏହି ସମୟରେ ପୁଣି ସୁନ୍ଦରଗଡ଼ରେ ଫାଶ ପକାଇ ହାତୀ ଛୁଆ ମାରିବାର ଖବର ଆସିଛି ।

from Odisha Reporter https://ift.tt/3e4T9QU