ଯୁଦ୍ଧ ପାଇଁ ପ୍ରସ୍ତୁତ ହେବାକୁ ସେନାକୁ କହିଲେ ଜିନ୍ ପିଙ୍ଗ୍

ବେଜିଂ: ଏଲଏସିରେ ଭାରତ ସହିତ ଚାଇନାର ବିବାଦ ଜାରି ରହିଛି। ଯଦିଓ ଦୁଇ ଦେଶ ମଧ୍ୟରେ ହେଉଥିବା ବୈଠକ ସଫଳ ହେଉଛି ବୋଲି କୁହାଯାଉଛି ହେଲେ ଗ୍ରାଉଣ୍ଡ ଜୀରୋରେ ସ୍ଥିତି ଓଲଟା ରହିଛି। ଏହାରି ଭିତରେ ଚାଇନା ରାଷ୍ଟ୍ରପତି ଶି ଜିନ୍ ପିଙ୍ଗ୍ ପିପୁଲସ ଲିବରେସନ ଆର୍ମି (ପିଏଲଏ)କୁ ଯୁଦ୍ଧ ପାଇଁ ପ୍ରସ୍ତୁତ ରହିବାକୁ କହିଛନ୍ତି।

ବେଜିଂର ଖବର ସରବରାହ ସଂସ୍ଥା ଏଭଳି ଖବର ପ୍ରକାଶ କରିଥିବା ସିଏନଏନ କହିଛି। ଅକ୍ଟୋବର ୧୪ରେ ଜିନ୍ ପିଙ୍ଗ୍ ଚାଇନାର ଦକ୍ଷିଣ ପ୍ରାନ୍ତରେ ଥିବା ଗୁଆଙ୍ଗଡୋଙ୍ଗର ମିଲିଟାରୀ ବେସକୁ ଆସିଥିଲେ। ଏହି ସମୟରେ ପିଏଲଏକୁ ହାଇ ଆଲର୍ଟରେ ରହିବାକୁ କହିଥିବା ସୂଚନା ରହିଛି। ଏମିତିକି ଯୁଦ୍ଧ ପାଇଁ ସମସ୍ତ ଶକ୍ତି ଓ ସାମର୍ଥ୍ୟ ଲଗାଇବା ପାଇଁ ଜିଙ୍ଗ୍ ପିଙ୍ଗ୍ ପିଏଲଏକୁ ଆହ୍ୱାନ କରିଛନ୍ତି।

ଅନ୍ୟପଟେ ସୀମାରେ ଉତ୍ତେଜନା ହ୍ରାସ କରିବା ପାଇଁ ଭାରତ ଏବଂ ଚାଇନା ମଧ୍ୟରେ ଆଲୋଚନା ଚାଲିଛି। ଅକ୍ଟୋବର ୧୨ରେ ଦୁଇ ଦେଶ ମଧ୍ୟରେ ସପ୍ତମ ରାଉଣ୍ଡ ସାମରିକ ବୈଠକ ହୋଇଥିଲା।

ଏହାପରେ ମଙ୍ଗଳବାର ଦୁଇ ଦେଶର ସେନା ମିଳିତ ବିବୃତ୍ତିରେ କହିଥିଲେ ଆଲୋଚନା ସକରାତ୍ମକ ରହିଛି। ହେଲେ ପୂର୍ବ ଲଦାଖର ସୀମାରେ ଦୁଇ ଦେଶ ସେନା ପ୍ରତ୍ୟାହାର ନେଇ କୌଣସି ଆଲୋଚନା ସଫଳ ହୋଇନଥିଲା।

The post ଯୁଦ୍ଧ ପାଇଁ ପ୍ରସ୍ତୁତ ହେବାକୁ ସେନାକୁ କହିଲେ ଜିନ୍ ପିଙ୍ଗ୍ appeared first on Odisha Reporter.

from Odisha Reporter https://ift.tt/375YFBQ