ସୀମାରେ ଧଳା ଚୂନରେ ଗାର ଟାଣିଲା ଆନ୍ଧ୍ର, ଉଡ଼ାଇଲା ପତାକା

କୋରାପୁଟ(ସୂର୍ଯ୍ୟ ନାରାୟଣ ପଣ୍ଡା): ସୀମା ବିବାଦକୁ ନେଇ ଓଡ଼ିଶା-ଆନ୍ଧ୍ର ମୁହାଁମୁହିଁ ହୋଇଥିବା ବେଳେ ଏହି ବିବାଦ କ୍ରମଶଃ ପ୍ରଶମିତ ହେଉଥିବା ଜଣାଯାଇଛି। ଦୀର୍ଘ ଆଠଦିନର ରାସ୍ତାରୋକ ହଟାଇବା ପରେ କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ ସମ୍ବାଇ ପଂଚାୟତର ସୁନାବେଡା ଗ୍ରାମ ନିକଟବର୍ତ୍ତୀ ଓଡିଶା ଓ ଆନ୍ଧ୍ର ସୀମାରେ ଏବେ ଉତ୍ତେଜନା ଶାନ୍ତ ପଡିଛି ।

ଆନ୍ଧ୍ରପ୍ରଦେଶର ଗ୍ରାମବାସୀଙ୍କ ଦ୍ୱାରା ରାସ୍ତା ଅବରୋଧକୁ ହଟାଯିବା ପରେ ଗତ ଗୁରୁବାର କୋରାପୁଟ ଜିଲ୍ଲା ପ୍ରଶାସନ ତରଫରୁ ରାଜସ୍ୱ ଅଧିକାରୀ ସୀମା ଅଞ୍ଚଳକୁ ଯାଇ ମାପଚୁପ ଆରମ୍ଭ କରିଥିଲେ । ସୀମାରେ ଥିବା ଓଡ଼ିଶାର ସୀମା ସୂଚକ ପଥର ସ୍ତମ୍ଭକୁ ମଧ୍ୟ ଠାବ କରିଥିବା ସେମାନେ ଜଣାଇଥିଲେ ।

ଏହାପରେ ଗତକାଲି ଆନ୍ଧ୍ରପ୍ରଦେଶ ତରଫରୁ ମଧ୍ୟ ଅନୁରୂପ ଭାବେ ସୀମାରେ ଧଳା ଚୂନରେ ଏକ ଗାର ଟାଣି ଧଳା ପତକା ଉଡାଯାଇଥିବା ଦେଖାଯାଇଛି ।

ଆନ୍ଧ୍ରପ୍ରଦେଶର କୋଲୁର ପଂଚାୟତ ସରପଞ୍ଚ ସୁନ୍ଦର ରାଓଙ୍କ କହିବା ଅନୁଯାୟୀ, ଏହା ସରକାରୀ ଅଧିକାରୀଙ୍କ ଦ୍ୱାରା ଲଗାଯାଇଛି। ହେଲେ ଅସମର୍ଥୀତ ସୂତ୍ରରୁ ଏହି କାର୍ଯ୍ୟ  ଜନସାଧାରଣଙ୍କ ଦ୍ୱାରା କରାଯାଇଥିବା ପ୍ରକାଶ । ତେବେ ଏହା ସାଧାରଣ ଲୋକଙ୍କ କାମ ନା ସରକାରୀ ତାହା ସ୍ପଷ୍ଟ ହୋଇପାରିନାହିଁ । କିନ୍ତୁ ପରିସ୍ଥିତି ନିୟନ୍ତ୍ରଣାଧୀନ ରହିଛି ବୋଲି ସ୍ଥାନୀୟ ଲୋକେ ସୂଚନା ଦେଇଛନ୍ତି ।

The post ସୀମାରେ ଧଳା ଚୂନରେ ଗାର ଟାଣିଲା ଆନ୍ଧ୍ର, ଉଡ଼ାଇଲା ପତାକା appeared first on Odisha Reporter.

from Odisha Reporter https://ift.tt/3lRrMgY