ଜନସନ ଆଣ୍ଡ ଜନସନ ଟିକାକୁ ଭାରତ ଦେଲା ଅନୁମତି

ନୂଆଦିଲ୍ଲୀ: ଆମେରିକାନ ଟିକା ଜନସନ୍ ଆଣ୍ଡ ଜନସନକୁ ଭାରତ ସରକାର ଜରୁରୀକାଳୀନ ଭାବରେ ବ୍ୟବହାର ପାଇଁ ଅନୁମତି ଦେଇଛନ୍ତି। ଦୁଇ ଦିନ ତଳେ ଜନସନ ଆଣ୍ଡ ଜନସନ ଜରୁରୀକାଳୀନ ଭାବରେ ବ୍ୟବହାର ପାଇଁ ଅନୁମତି ମାଗିଥିଲା। ଏହି ଟିକାର ବିଶେଷତ୍ୱ ହେଲା ଏହା ସିଙ୍ଗେଲ୍ ଡୋଜ। ଏହି ଟିକାକୁ ଅନୁମୋଦନ ଦେବା ପୂର୍ବରୁ ଭାରତ ସରକାର ୪ଟି ଟିକାକୁ ଜରୁରୀକାଳୀନ ଭାବରେ ବ୍ୟବହାର ପାଇଁ ଅନୁମତି ଦେଇ ସାରିଛନ୍ତି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡଭ୍ୟ ଟ୍ୱିଟ୍ କରି ଏହି ସୂଚନା ଦେଇଛନ୍ତି।

ଭାରତରେ ବିଭିନ୍ନ ଟିକା ତିଆରି କରୁଥିବା ବାୟୋଲଜିକାଲ ଇ ଲିମିଟେଡ ଜରିଆରେ ଏହି ଟିକା ଭାରତକୁ ଆସିବ ବୋଲି ସୂଚନା ରହିଛି। ଆମେରିକା, ବ୍ରିଟେନ ସମେତ ଅନେକ ଦେଶର ଏବେ ଏହି ଟିକା ବ୍ୟବହାର ହେଉଛି।

Johnson and Johnson’s single-dose #COVID19 vaccine is given approval for Emergency Use in India, tweets Union Health Minister Mansukh Mandaviya pic.twitter.com/52l7zHP7qC

— ANI (@ANI) August 7, 2021

ମେ ମାସର ଏକ ରିପୋର୍ଟ ଅନୁଯାୟୀ ପ୍ରଥମ ଦଫାରେ ବ୍ରିଟେନ ସରକାର ଜନସନ ଆଣ୍ଡ ଜନସନ ସିଙ୍ଗଲ ଡୋଜ୍‌ ଟିକାର ୨୦ ମିଲିୟନ ଡୋଜ୍‌ ମଗାଇଥିଲେ। ଏହା କରୋନା ବିରୋଧରେ ଲଢ଼େଇ କରିବାକୁ ୮୫% ସକ୍ଷମ ବୋଲି ମାନବ ପରୀକ୍ଷଣରୁ ଜଣାପଡ଼ିଛି। ତେଣୁ ସିଙ୍ଗଲ ଡୋଜ୍‌ କରୋନା ଟିକା ଗେମ ଚେଞ୍ଜର ସାବ୍ୟସ୍ତ ହେବ ବୋଲି କୁହାଯାଉଛି।

ଜନସନ ଆଣ୍ଡ ଜନସନ ଟିକା ଅନ୍ୟ ଟିକା ଭଳି ଅତ୍ୟନ୍ତ କମ୍ ତାପମାତ୍ରାରେ ରଖିବାର ଆବଶ୍ୟକତା ନାହିଁ। ଏହି ଟିକା ଥରୁଟିଏ ଦିଆଯିବ। କମ୍ପାନୀ ଏହି ଟିକାରେ ଆଡେନୋଭାଇରସ୍ ବ୍ୟବହାର କରିଛି। ଏହା ଶରୀରରେ ପ୍ରବେଶ କରିବା ମାତ୍ରେ କୋଷ ଗୁଡ଼ିକରେ କରୋନା ଭାଇରସ ପ୍ରୋଟିନ୍ ପ୍ରସ୍ତୁତ କରିବ। ଏହାଦ୍ୱାରା ଶରୀରରେ ଥିବା ପ୍ରୋଟିନ୍ ପ୍ରତିରକ୍ଷା ପ୍ରଣାଳୀକୁ ସୁଦୃଢ଼ କରିବ। ଯାହାକି କରୋନା ଭାଇରସ ମୁକାବିଲା କରିବାରେ ସାହାଯ୍ୟ କରିବ। ଭାରତ ପାଖରେ ଏହି ଟିକା ବ୍ୟତୀତ କୋଭଶିଲ୍ଡ, କୋଭାକ୍ସିନ, ସ୍ପୁଟନିକ୍ ଭି ଏବଂ ମୋର୍ଡେର୍ଣ୍ଣା ରହିଛି।

 

ସୂଚନାଯୋଗ୍ୟ, ଦେଶରେ କରୋନା ଟିକା ନେବା ପାଇଁ ଅଧିକ ସଂଖ୍ୟାର ଲୋକ ବାକି ରହିଛନ୍ତି। ମୁଖ୍ୟତଃ ଦୁଇଟି ଟିକା ନେଲେ ଟିକାକରଣ ସମ୍ପୂର୍ଣ୍ଣ ହେଉଥିବାରୁ ଟିକାକରଣ ପ୍ରକ୍ରିୟା ଧିମା ରହିଛି। ତେଣୁ ଏହି ସିଙ୍ଗେଲ ଡୋଜ ଟିକା ଏବେ ଦେଶରେ ଟିକାକରଣ ପ୍ରକ୍ରିୟାକୁ ଶେଷ କରିବାରେ ଏକ ବଡ଼ ଅସ୍ତ୍ର ସାଜିବ ବୋଲି କୁହାଯାଉଛି।

The post ଜନସନ ଆଣ୍ଡ ଜନସନ ଟିକାକୁ ଭାରତ ଦେଲା ଅନୁମତି appeared first on Odisha Reporter.

from Odisha Reporter https://ift.tt/2VEGHmf