ଲିଙ୍ଗରାଜ ମନ୍ଦିରକୁ ଶିଶୁଙ୍କ ପ୍ରବେଶ ମନା, ଗର୍ଜିଲେ ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା

ଭୁବନେଶ୍ୱର(ଓଡ଼ିଶା ରିପୋର୍ଟର): ଶ୍ରୀଲିଙ୍ଗରାଜ ମନ୍ଦିର ପ୍ରଶାସନର ଅଜବ ନିୟମକୁ ନେଇ ପ୍ରଶ୍ନ ଉଠାଇଛନ୍ତି ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ । ଲିଙ୍ଗରାଜ ମନ୍ଦିରକୁ ଭକ୍ତଙ୍କୁ ପ୍ରବେଶ ଅନୁମତି ଅଛି, ହେଲେ ଶିଶୁଙ୍କୁ ନାହିଁ। ଏପରି ନିୟମ ଲାଗୁ ହେବା ଦ୍ୱାରା ନାନା ଅସୁବିଧାର ସମ୍ମୁଖୀନ ହେଉଛନ୍ତି ଭକ୍ତ। ନା ନିଜେ ପ୍ରଭୁଙ୍କ ଦର୍ଶନ କରିବାକୁ ଯାଇପାରୁଛନ୍ତି, ନା ପିଲାଙ୍କୁ ବାହାରେ ଛାଡ଼ି ପାରୁଛନ୍ତି। ପିଲାମାନେ ବାହାରେ ଘଣ୍ଟା ଘଣ୍ଟା ଧରି ଖରା, ବର୍ଷାରେ ଛିଡ଼ା ହେବା ଦ୍ୱାରା ସେମାନଙ୍କ ଶିଶୁ ଅଧିକାର ଉଲ୍ଲଂଘନ ହେଉଛି । ତେଣୁ ତୁରନ୍ତ ଏ ଦିଗରେ ପଦକ୍ଷେପ ନେବାକୁ ତାଗିଦ କରିଛନ୍ତି ସନ୍ଧ୍ୟାବତୀ ପ୍ରଧାନ ।

ସୂଚନାଯୋଗ୍ୟ, ପୁରୀ ଶ୍ରୀମନ୍ଦିର ଭିତରକୁ ଭକ୍ତଙ୍କ ସମେତ ସେମାନଙ୍କ ଶିଶୁଙ୍କୁ ପ୍ରବେଶ ଅନୁମତି ରହିଛି। ହେଲେ ଲିଙ୍ଗରାଜ ମନ୍ଦିରରେ ଏଥିରେ ଲାଗିଛି କଟକଣା। କୋଭିଡ କଟକଣା ପାଇଁ ୧୮ ବର୍ଷରୁ କମ୍ ବୟସ୍କଙ୍କୁ ଲିଙ୍ଗରାଜ ମନ୍ଦିରକୁ ବାରଣ କରାଯାଇଛି ।

ଫଳରେ ଶ୍ରଦ୍ଧାଳୁମାନଙ୍କୁ ଭିତରକୁ ଯିବାକୁ ଅନୁମତି ଥିବା ବେଳେ ପିଲାମାନଙ୍କ ପାଇଁ କିନ୍ତୁ ଲାଗିଛି କଟକଣା। ଏପରି କ୍ଷେତ୍ରରେ ଶ୍ରଦ୍ଧାଳୁମାନେ କାହା ଭରସାରେ ଓ କେଉଁଠି ପିଲାଙ୍କୁ ଛାଡ଼ି ପ୍ରଭୁ ଦର୍ଶନ ପାଇଁ ଯିବେ ତାକୁ ନେଇ ଦ୍ୱନ୍ଦ୍ୱ ଓ ଅସନ୍ତୋଷ ଦେଖା ଦେଇଛି। ଏପରି ନିୟମ ଲାଗୁ ହେବା ପରେ ମନ୍ଦିର ପ୍ରଶାସନ କର୍ତ୍ତୃପକ୍ଷଙ୍କ ଉପରେ ଗର୍ଜିଛନ୍ତି ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ।

ପିଲାଙ୍କ ସହ ଶ୍ରଦ୍ଧାଳୁ ବାହାରେ ଅପେକ୍ଷାରତ ।

ଶ୍ରୀମନ୍ଦିରରେ ପର୍ଯ୍ୟଟକମାନେ ଶିଶୁଙ୍କୁ ନେଇ ଦର୍ଶନ କରୁଥିବାବେଳେ ଶ୍ରୀଲିଙ୍ଗରାଜଙ୍କ ମନ୍ଦିରରେ କାହିଁକି ଅନୁମତି ଦିଅଆଯାଉନି ସେନେଇ ସେ ମନ୍ଦିର ପ୍ରଶାସନକୁ ତାଗିଦ୍ କରିବେ ବୋଲି କହିଛନ୍ତି  । ଏହାସହ ସିଂହଦ୍ୱାର ନିକଟରେ ଶିଶୁ ମାନେ ଦର୍ଶନ ନକରି ଘଣ୍ଟା ଘଣ୍ଟା ଛିଡା ହେବା ଶିଶୁ ଅଧିକାର ଆଇନ୍‌କୁ  ଉଲ୍ଲଂଘନ କରୁଛି । ଏହାଦ୍ୱାରା ପର୍ଯ୍ୟଟନ କ୍ଷେତ୍ର ପ୍ରଭାବିତ ହେଉଥିବାରୁ ପର୍ଯ୍ୟଟନ ବିଭାଗର ଦୃଷ୍ଟି ଆକର୍ଷଣ କରିବେ ବୋଲି ଅଧ୍ୟକ୍ଷା କହିଛନ୍ତି ।

ଅପରପକ୍ଷେ, ଦୂରଦୂରାନ୍ତରୁ ପରିବାର ସହ ପ୍ରଭୁ ଲିଙ୍ଗରାଜଙ୍କ ଦର୍ଶନ କରିବାକୁ ଆସୁଥିବା ପର୍ଯ୍ୟଟକ ମନ୍ଦିର ପ୍ରଶାସନର ଏପରି ନିଷ୍ପତ୍ତି ଶୁଣି ଚକିତ ହୋଇ ଯାଉଛନ୍ତି। ପିଲାଙ୍କୁ କାହା ଭରସାରେ ଓ କେଉଁଠି ଛାଡ଼ି ଭିତରକୁ ଯିବେ ସେ ନେଇ ପ୍ରଶ୍ନ କରିଛନ୍ତି। ମନ୍ଦିର ପ୍ରଶାସନ ନିୟମ ଲାଗୁ କଲେ, ଏହା କିପରି ପାଳନ ହେବ ସେ ନେଇ ମଧ୍ୟ ଗୁରୁତ୍ୱାରୋପ କରି ପଦକ୍ଷେପ ଗ୍ରହଣ କରିବା ଉଚିତ ବୋଲି କହିଛନ୍ତି ପର୍ଯ୍ୟଟକ । ହେଲେ ମନ୍ଦିର ପ୍ରଶାସନ କେବଳ ନିୟମ ଲାଗୁ କରି ଚୁପ୍‌ ବସିଥିବାରୁ ସେମାନେ ଅସନ୍ତୋଷ ଝାଡ଼ିଛନ୍ତି।

The post ଲିଙ୍ଗରାଜ ମନ୍ଦିରକୁ ଶିଶୁଙ୍କ ପ୍ରବେଶ ମନା, ଗର୍ଜିଲେ ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷା appeared first on Odisha Reporter.

from Odisha Reporter https://ift.tt/3Ga8e12