ଆଜି ପଞ୍ଜାବ ଭୋଟ୍‌

ଚଣ୍ଡିଗଡ: ପଞ୍ଜାବରେ ଆରମ୍ଭ ହୋଇଛି ଭୋଟିଂ। ଆଜି ସମସ୍ତ ୧୧୭ଟି ବିଧାନସଭା ଆସନରେ ଭୋଟ ଗ୍ରହଣ ଆରମ୍ଭ ହୋଇଛି। ସକାଳ ୮ଟାରୁ ମତଦାନ ଆରମ୍ଭ ହୋଇ ସନ୍ଧ୍ୟା ୬ଟା ଯାଏଁ ଚାଲିବ। ୧ହଜାର ୩୦୪ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୨ କୋଟି ୧୪ଲକ୍ଷ ଭୋଟର।

ଚଳିତଥର ପଞ୍ଜାବ ନିର୍ବାଚନ ବେଶ ରୋଚକ ହେବାକୁ ଯାଉଛି। କଂଗ୍ରେସ, ଆପ, ଅକାଳୀ-ବିଏସପି ମେଣ୍ଟ, ବିଜେପି-ପିଏଲସି-ଏସଏଡି(ସଂଯୁକ୍ତ) ଏବଂ ସଂଯୁକ୍ତ ସମାଜ ମୋର୍ଚ୍ଚା କ୍ଷମତା ପାଇଁ ପ୍ରତିଦ୍ୱନ୍ଦ୍ୱିତା କରୁଛନ୍ତି।

ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନି, ଆମ ଆଦମୀ ପାର୍ଟି ମୁଖ୍ୟମନ୍ତ୍ରୀ ପ୍ରାର୍ଥୀ ଭଗୱନ୍ତ ସିଂହ ମାନ, ପଞ୍ଜାବ କଂଗ୍ରେସ ମୁଖ୍ୟ ନବଜ୍ୟୋତ ସିଂ ସିଦ୍ଧୁ, ପୂର୍ବତନ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂ ଓ ପ୍ରକାଶ ସିଂ ବାଦଲ, ଶିରୋମଣି ଅକାଳି ଦଳର ଅଧ୍ୟକ୍ଷ ସୁଖବୀର ସିଂ ବାଦଲଙ୍କ ଭଳି ହେଭିୱେଟ ନେତାଙ୍କ ଭାଗ୍ୟ ନିର୍ଦ୍ଧାରଣ କରିବେ ଜନତା। ଏଠାରେ ପ୍ରତିଦ୍ୱନ୍ଦିତା କରୁଥିବା ପ୍ରାର୍ଥୀଙ୍କ ମଧ୍ୟରେ ୯୧ ଜଣ ମହିଳା ଅଛନ୍ତି।

#PunjabElections2022 | Mock polling underway at booth number 158 to 161 at Govt Girls Sr. Sec. School, Moga as voting on 117 Assembly seats to start at 8am pic.twitter.com/hjxNiarhY2

— ANI (@ANI) February 20, 2022

ମତଦାନ ପାଇଁ ରାଜ୍ୟରେ ମୋଟ ୨୪ ହଜାର ୭୪୦ଟି ମତଦାନ କେନ୍ଦ୍ର କରାଯାଇଛି। ଏଥିମଧ୍ୟରୁ ୨୦୧୩ଟି ବୁଥ ସମ୍ୱେଦନଶୀଳ ରହିଛି। ମୁକ୍ତ ଏବଂ ଅବଧା ନିର୍ବାଚନ ପାଇଁ ଆବଶ୍ୟକୀୟ ସମସ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଅନ୍ୟପଟେ ନିର୍ବାଚନକୁ ଦୃଷ୍ଟିରେ ରଖି ରବିବାର ରାଜ୍ୟ ସରକାର ଦୋକାନ, ଫ୍ୟାକ୍ଟ୍ରି, ବାଣିଜ୍ୟିକ ପ୍ରତିଷ୍ଠାନର କର୍ମଚାରୀଙ୍କ ପାଇଁ ଛୁଟି ଘୋଷଣା କରିଛନ୍ତି।

ସେପଟେ ଆଜି ଉତ୍ତରପ୍ରଦେଶରେ ତୃତୀୟ ପର୍ଯ୍ୟାୟ ମତଦାନ ଆରମ୍ଭ ହୋଇଛି। ୟୁପିର ୧୬ ଜିଲ୍ଲାର ୫୯ ଆସନ ପାଇଁ ଭୋଟ ଗ୍ରହଣ ଚାଲିଛି। ପ୍ରାୟ ୨ କୋଟି ୧୬ ଲକ୍ଷ ଭୋଟର ଭୋଟ ଦେଇ ୬୨୭ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। ସକାଳ ୭ଟାରୁ ବିଭିନ୍ନ ବୁଥରେ ଭୋଟ ଗ୍ରହଣ ଆରମ୍ଭ ହୋଇଥିବା ବେଳେ ଏହି ପ୍ରକ୍ରିୟା ସନ୍ଧ୍ୟା ୬ଟା ଯାଏଁ ଚାଲିବ।

ତୃତୀୟ ପର୍ଯ୍ୟାୟ ମତଦାନରେ ୟୁପିର ତିନି ପ୍ରମୁଖ ଅଂଚଳ ପଶ୍ଚିମ ୟୁପି, ବୁନ୍ଦେଲଖଣ୍ଡ ଓ ଅବଧ ଅଞ୍ଚଳରେ ଭୋଟିଂ ହେଉଛି । ସକାଳୁ ସକାଳୁ ବିଭିନ୍ନ ବୁଥରେ ଲମ୍ବା ଧାଡିରେ ଠିଆ ହୋଇ ଭୋଟରମାନେ ଭୋଟ୍ ଦେଉଛନ୍ତି। ତୃତୀୟ ପର୍ଯ୍ୟାୟ ଭୋଟିଂରେ ବିଶେଷ କରି ବିଜେପି ଓ ସମାଜବାଦୀ ପାର୍ଟି ମଧ୍ୟରେ କଡା ଟକ୍କର ହେବ ବୋଲି ଚର୍ଚ୍ଚା ହେଉଛି।

The post ଆଜି ପଞ୍ଜାବ ଭୋଟ୍‌ appeared first on Odisha Reporter.

from Odisha Reporter https://ift.tt/GFZRaAv