ଭୁବନେଶ୍ୱର ଷ୍ଟେସନରୁ ଟ୍ରେନ୍ ଚଳାଚଳ ସ୍ୱାଭାବିକ

ଭୁବନେଶ୍ୱର(ଓଡ଼ିଶା ରିପୋର୍ଟର): ଭୁବନେଶ୍ୱର ରେଳ ଷ୍ଟେସନରୁ ଟ୍ରେନ ଚଳାଚଳ ସ୍ୱାଭାବିକ ହୋଇଛି। ଟ୍ରାକ ମରାମତି ପରେ ଆଜି ସକାଳ ୮ଟା ୧୫  ପରେ ଉଭୟ ରୁଟ୍‌ରେ ଟ୍ରେନ୍ ଚଳାଚଳ ଆରମ୍ଭ କରିଥିଲା। ପ୍ରଥମେ କୋଏମ୍ବାଟୁର-ହାଓଡ଼ା ଏକ୍ସପ୍ରେସ ଏହି ରୁଟ୍‌ ଦେଇ ଯାଇଥିଲା। ତେବେ ଦୁର୍ଘଟଣାସ୍ଥଳରେ ଟ୍ରେନ୍  ୧୫ କିଲୋମିଟର ବେଗରେ ଗତି କରିବାକୁ ପୂର୍ବତଟ ରେଳପଥ କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି।

ଟ୍ରେନ ଚଳାଚଳ ସ୍ୱାଭାବିକ ହେବା ପୂର୍ବରୁ ‌ଆଜି ପାଇଁ ୬ଟି ପାସେଞ୍ଜର ଟ୍ରେନର ଚଳାଚଳ ବାତିଲ କରାଯାଇଥିଲା। ଭୁବନେଶ୍ୱର-ହାଓଡ଼ା, ଭୁବନେଶ୍ୱର-ବଲାଙ୍ଗିର, ପୁରୀ-ପାରାଦୀପ ପାସେଞ୍ଜର ଟ୍ରେନକୁ ବାତିଲ କରି ଦିଆଯାଇଥିଲା। ସେହିପରି ପୁରୀ-ବଡ଼ବିଲ, ତାଳଚେର-ପୁରୀ ଓ ପାରାଦୀପ-କଟକ ପାସେଞ୍ଜର ଟ୍ରେନ ବାତିଲ କରାଯାଇଥିଲା। ଟ୍ରେନ୍ ଚଳାଚଳ ସ୍ୱାଭାବିକ ହୋଇଥିଲେ ମଧ୍ୟ ଏହି ୬ଟି ପାସେଞ୍ଜର ଟ୍ରେନ ଚଳାଚଳ ବାତିଲ ରହିଛି।

ଗତକାଲି ରାତି ପ୍ରାୟ ୮ଟା ୩୫ ସମୟରେ ଭୁବନେଶ୍ୱର ଷ୍ଟେସନ ପାଖରେ ଏକ ମାଲବାହୀ ଟ୍ରେନ୍‌ ଲାଇନ୍‌ଚ୍ୟୁତ୍‌ ହୋଇଥିଲା। ଚକ୍ରଧରପୁରରୁ ବିଜୟନଗରମ୍ ଯାଉଥିବା ସିମେଣ୍ଟ ବୋଝେଇ ମାଲବାହୀ ଟ୍ରେନ୍‌ର ୫ଟି ବଗି ଟ୍ରାକ୍‌ରୁ ତଳକୁ ଯାଇଥିଲା। ଫଳରେ ଟ୍ରାକ୍ ଓ ଇଲେକ୍ଟ୍ରିକ୍ ଲାଇନ କ୍ଷତିଗ୍ରସ୍ତ ହୋଇଥିଲା। ଦୁର୍ଘଟଣା ପରେ ଘଟଣାସ୍ଥଳରେ ରେଲୱେ ଅଧିକାରୀ ଓ ଦୁଇଶହରୁ ଅଢ଼େଇ ଶହ କର୍ମଚାରୀ ପହଞ୍ଚି ମରାମତି କାର୍ଯ୍ୟ ଆରମ୍ଭ କରିଥିଲେ। ସକାଳ ୮ଟା ସୁଦ୍ଧା ମରାମତି ଶେଷ ହୋଇଥିଲା। ଏହାପରେ ଟ୍ରେନ୍ ଚଳାଚଳ ସ୍ୱାଭାବିକ ହୋଇଛି।

The post ଭୁବନେଶ୍ୱର ଷ୍ଟେସନରୁ ଟ୍ରେନ୍ ଚଳାଚଳ ସ୍ୱାଭାବିକ appeared first on Odisha Reporter.

from Odisha Reporter https://ift.tt/QDLHbgJ